Vranësirat të cilat po i shohim tani janë paralajmërim për ndryshimin e kushteve sinoptike sonte gjatë natës.
Pra, mbi rajonin tonë sonte dhe nesër do të kemi kalimin e një fronti të ftohtë ajror në kuadër të një cikloni të dobët dhe kalimtar. Gjatë orëve të natës dhe mëngjesit të nesërm do të kemi reshje shiu dhe bore në Kosovë si dhe ulje të ndjeshme të temperaturave. Gjithashtu priten edhe erëra veriore të cilat në disa rajone do të arrijnë shpejtësinë maksimale rreth 60 km-h. Reshjet nuk do të jenë të mëdha por do të jenë mjaft dekorative në disa rajone veçanërisht në Kosovë.
Në viset bregdetare dhe mesdhetare do të ketë reshje shiu, kurse në viset kontinentale do të ketë edhe reshje bore, pak më intensive në viset kodrinore-malore. Reshjet lokale të dëbores (të përziera me shi vende-vende) do të vazhdojnë edhe nesër sidomos paradite, me tendenca të dobësimit gjatë dites, kurse pasdite reshjet pritet të pushojnë tërësisht./Meteoballkan
