Edhe për pak çaste jemi nën ndikimin e masave mjaft të ngrohta ajrore të mbetura të cilat do të largohen sonte me depërtimin e frontit të ftohtë nga veriu i Kontinentit.
Fronti i ftohtë nuk do të jetë i fuqishëm sikur në Slloveni dhe Kroaci, por prapëseprapë mjaftueshëm i fuqishëm për ti ulur temperaturat dhe për të na sjellë reshje lokale, përpos shiut edhe bore. Pas frontit temperaturat e ulëta depërtojnë lirshëm nga veriu.
Fillimisht pritet të fillojnë reshje shiu të cilat me ndryshimin e drejtimit të erërave shumë shpejt do të shndërrohen në reshje bore në veri të vendit dhe atë në viset kodrinore-malore. Gjatë mbrëmjes reshje bore priten edhe në shumë ultësira të Republikës së Kosovës, por nuk duhet pritur reshje bore në çdo ultësirë dhe në çdo cep të territorit.
Në përgjithësi nuk priten reshje të mëdha ditëve të ardshme. Në viset kodrinore-malore të Kosovës pritet nëse mund të themi “skenar dimëror”. Temperaturat kthehen rreth vlerave mesatare për këtë periudhë kohore dhe pas një periudhe shumë të ngrohtë po i kthehemi “normalitetit dimëror”.
Edhe ditëve të ardshme pritet mot jo-stabil dhe kryesisht i vranët, me reshje të herëpashershme shiu e bore, por pa reshje të mëdha në tërë territorin./MeteoBallkan