Policia e Kosovës ka dhënë detaje për aksidentin e rëndë në fshatin Hodonovc të Kamenicës, si pasojë e të cilit mbeti i vdekur një person.
Sipas policisë viktima është 33 vjeçar. Si pasojë e aksidentit kanë mbetur të lënduar edhe tre persona të tjerë, të cilët janë duke marrë trajtim në qendrën emergjente në Gjilan.
Shkaqet e aksidentit ende janë të pa njohura dhe po hetohen nga hetues policor të aksidenteve.
“Drejtoria Rajonale e Policisë Gjilan, Stacioni Policor Kamenicë me datën 24.02.2023, rreth orës 10:43 ka pranuar informacion se në fshatin Hodonovc, Komuna e Kamenicës ka ndodhur një aksident trafiku në mes të dy automjeteve me tabela vendore. Hetuesit policorë kanë dalë në vendin e ngjarjes së bashku me ekipin mjekësor dhe njësitin e zjarrfikësve. Si pasojë e këtij aksidenti një person mashkull kosovar rreth moshës 33 vjeçar nuk ka arritur që të u mbijetoj lëndimeve dhe ka ndërruar jetë, vdekjen e të cilit e ka konfirmuar mjekut kujdestar në vendin e ngjarjes.
Nga ky aksident, tre persona tjerë kanë pësuar lëndime trupore të cilët janë duke marrë trajtim në qendrën emergjente në Gjilan”, njofton Policia.
Kujtojmë se të mërkurën mbrëma, katër persona vdiqën në një aksident të rëndë që ndodhi në rrugën Ferizaj-Shtime në orët e mbrëmjes.
Sipas Policisë, deri te aksidenti dyshohet se ka ardhur kur drejtuesi i njërës nga veturat për arsye deri më tani të pa njohura, humb kontrollin mbi veturë dhe godet dy veturat tjera të cilat ishin duke lëvizur në drejtim të kundërt.
