Cikloni masiv po shihet tani qartë në Skandinavi dhe Rusi, ndërsa fronti i tij po përparon drejt territoreve tona. Fronti pritet të arrijë pas mesnate në veri të Kosovës duke kushtëzuar reshje shqote bore pas reshjeve të shiut që pritet të fillojnë më herët. Fonti do të përparojë në drejtim të jugut dhe lindjes gradualisht.
Me kalimin e frontit të ftohtë atmosferik një vorbullë (ciklon sekondar) e fuqishme ciklonike formohet në jug të Detit Adriatik duke u zgjeruar shumë shpejt drejt Detit Jon, Egje dhe pastaj drejt Detit të Zi dhe në këtë mënyrë krijohet një ciklogjenezë me shtrirje të gjerë dhe e fuqishme në Evropen juglindore e cila rigjeneron reshjet e borës gjatë ditës së shtunë në territorin e Republikës së Kosovës duke formuar shtresa bore. Cikloni do të thellohet tutje dhe kj otreon fuqinë e tij duke shkaktuar ulje të mëtutjeshme të presionit atmosferik.
Në këtë kohë (e shtunë) reshje bore parashihen në Kosovë, veri të Malit të Zi, veri dhe lindje të Shqipërisë, Luginë të Preshevës dhe pak më vonë edhe në Maqedoninë Veriore. Normalisht, në viset kodrinore-malore bora do të fillojë shumë më herët (sonte), ndërsa nëpër ultësira duhet kohë deri sa shiu të shndërrohet në borë (vende-vende sonte, vende-vende deri nesër pasdite).
Për fund një sqarim: Të gjitha këto zhvillime janë krejtësisht normale për rajonin tonë në aspektin meteorologjik, prandaj nuk ka asnjë arsye për ndonjë shqetësim ose panik. Të gjitha sqarimet janë për arsye informuese sidomos për reshje bore të cilat kanë munguar për kohë shumë të gjatë nëpër ultësirat tona./MeteoBallkan
