Sot në Kosovë pritet të mbajë mot me vranësira dhe në disa rajone priten edhe intervale kohore me diell. Vende-vende priten edhe riga shiu, por në shumë pjesë të territorit nuk priten reshje shiu. Temperatura maksimale pritet të arrijë deri në 13 gradë Celsius në nivel vendi.
Në Shqipëri pritet të ketë mot të ndryshueshëm, me intervale kohore me diell në perëndim dhe disa vise në qendër dhe juglindje. Në veri priten reshje shiu lokalisht intensive. Edhe në jug priten riga lokale shiu.
Reshje shiu priten edhe në Mal të Zi, ndërsa në Maqedoninë Veriore dhe Luginën e Preshevës priten alternime mes vranësirave dhe intervaleve kohore me diell. Rrallë në ndonjë rajon priten riga lokale shiu.
Të hënën në tërë rajonin na pret mot kryesisht i vranët dhe me reshje shiu. Në Mal të Zi dhe Shqipëri vende-vende priten reshje intensive shiu dhe mundësi për rrebeshe lokale me vetëtima dhe bubullimë.
Reshje shiu të hënën priten edhe në Kosovë dhe Luginë, por gjithashtu riga lokale shiu priten edhe në Maqedoninë Veriore. Në Dukagjin vende-vende reshjet do të jenë pak më intensive. Temperaturat pritet të shënojnë ulje të lehta.
Nga e marta na pret mot me intervale kohore me diell, vranësira dhe në disa vise me riga shiu kryesisht të dobëta./MeteoBallkan
