Ky ciklon është formuar tani dhe gjendet mbi Itali dhe shtrihet që nga Deti Tiren deri në Detin Jon. Erërat veriore që po fryjnë tani po i shkakton pikërisht ky ciklon dhe shumë shpejt do të shohim edhe vranësira të dendura që mbulojnë rrezet diellore që po i shohim në këto çaste. Vranësirat e dendura pritet të fillojnë të vijnë pasdite e sidomos në mbrëmje kur pritet të ketë edhe reshje lokale shiu e bore. Në orët e vona të natës reshje shiu e bore priten në gati tërë territorin e Shqipërisë, Kosovës, Maqedonisë së Veriut, Malit të Zi dhe Luginës së Preshevës.
Në jug të Shqipërisë do të ketë reshje mjaft të dendura shiu, ndërsa në juglindje të vendit priten reshje mjaft të dendura bore. Në perëndim të Shqipërisë priten kryesisht reshje shiu, ndërsa në lindje reshje bore.
Në mbrëmje vonë ose gjatë natës reshje bore do të fillojnë edhe në Republikën e Kosovës. Në disa ultësira të Kosovës temperaturat jo shumë të ulëta mund të mos suportojnë reshjet e borës. Erërat lindore dhe verilindore do të vijnë duke u fuqizuar. Reshjet më të fuqishme të borës ku pritet edhe dimër i vërtetë priten në juglindje të Shqipërisë, veri të Greqisë, viset kodrinore-malore të Maqedonisë së Veriut dhe veriun e Malit të Zi, por reshje bore priten edhe në shumicën e territorit të Kosovës dhe Luginës së Preshevës, prandaj dimër i vërtetë pritet edhe në këto rajone sidomos në viset kodrinore-malore.
Reshjet e borës do të vazhdojnë herë pas here edhe të dielën, të hënën dhe të martën, por do të vijnë duke u dobësuar dhe lokalizuar në disa zona kryesisht në disa vise të Kosovës dhe vise malore të rajonit. Temperaturat pësojnë ulje, por nuk pritet ndonjë i ftohtë i madh. Në viset malore ato minimale mund të ulen deri në -10 gradë Celsius, ndërsa nëpër ultësira rreth -5 gradë Celsius, kurse ato maksimale rreth 4 deri në 6 gradë Celsius nëpër ultësira. Ndjesinë subjektive të të ftohtit polar do ta shtojnë erërat e ftohta nga verilindja.
Përmirësim dhe stabilizim të motit pritet të kemi nga mesi i javës, por ende mbetet relativisht ftohtë./MeteoBallkan