Ashtu siç kemi paralajmëruar përtej brigjeve perëndimore të Italisë në Mesdhe është krijuar qendra ciklonike me rreth 980 milibar – shtypje atmosferike. Ky ciklon është jashtëzakonisht i fuqishëm për këtë periudhë kohore dhe nuk ndodhë shpesh. Ciklone të tilla në Mesdhe krijohen pak më shpesh në vjeshtë dhe pranverë. Qendra ciklonike ka edhe elemente Uragani siç është syri, pastaj erërat e fuqishme përrreth atij rajoni.
Ky ciklon Uraganik apo Medikan siç njihet në terminologjinë meteorologjike po përparon në drejtim të rajonit tonë. Gjatë natës dhe ditës së nesërme qendra e ciklonit do të gjendet mu mbi Detin jonë. Gjatë mbrëmjes së sontme fillimisht në Jug të Shqipërisë do të fillojnë reshje të dendura shiu, lokalisht edhe stuhi të fuqishme me vetëtima dhe bubullimë. Pastaj reshjet do të shtrihen në drejtim të rajoneve tjera të Shqipërisë, në drejtim të Maqedonisë dhe në orët e vona apo gjatë natës reshjet do të përfshijnë edhe territorin e Republikës së Kosovës. Reshje të dendura shiu priten në Shqipërinë Bregdetare dhe Ultësirën Perëndimore, lokalisht edhe stuhi të fuqishme me vetëtima, bubullimë dhe breshër. Reshje të dendura bore priten në juglindje, lindje, verilindje dhe veri të Shqipërisë. Reshje të dendura shiu dhe bore do të përfshijnë edhe Maqedoninë ku pastaj me uljen e temperaturave do të ketë vetëm reshje të dendura bore.
Reshje bore gjatë natës do të përfshijnë territorin e Republikës së Kosovës, lokalisht me stuhi dëbore me erëra të fuqishme verilindore. Reshjet e borës do të intensifikohen gjatë paraditës dhe ditës së Premte në Kosovë ku priten reshje mjaft të dendura bore, kurse në viset kodrinore malore priten stuhi dimërore dhe bllokada dimërore. Reshje të fuqishme bore do të ketë gjatë tërë ditës së Premte deri në orët e vona të natës dhe ndoshta deri të mëngjesi i së shtunës, megjithatë gjatë natës reshjet e borës pritet të ulen në intensitet. Në tërë Kosovën do të ketë shtresa bore nga 20 deri në 50 cm borë, kurse në viset malore lokalisht trashësia e borës mund të shkojë deri në 1 metër./Meteoballkan
