Në Itali, Detin Adriatik, Detin Tiren e më gjerë në Mesdhe është krijuar një ciklon gjigand që shtrihet që nga jugu u Francës deri në jug të Ukrainës thellë në lindje të Evropës, ndërsa territoret tona gjenden nën “sundimin” e plotë të këtij cikloni gjigand.
Për këtë arsye ka erëra të fuqishme, ndërsa ne gjendemi në sektorin e ngrohtë të masave ajrore ciklonike. Vetëm disa kilometra në veri gjenden temperaturat e ulëta me reshje bore dhe fjala është për territorin e Sangjakut, veriun e Malit të Zi etj. ku ajri i ftohtë do të arrijë të penetrojë, ndërsa në territoret tona do të vazhdojnë rrymimet e fuqishme ajrore të ngrohta nga jugu. Reshjet e dendura të borës do të përfshijnë Bosnjën dhe jugperëndimin e Serbisë si dhe veriun e Malit të Zi, ndërsa në viset tona do të ketë kryesisht vetëm reshje shiu, ngase temperaturat e ulëta polare që do të arrijnë deri te kufijtë tanë nuk do të arrijnë në territoret tona në kohën e reshjeve për të favorizuar reshjet e borës dhe kjo gjendje sinoptike është përsëritur disa herë gjatë këstij viti.
Përderisa sot dhe nesër bora e dendur do të zbardhë Bosnjën, veriun e Malit të Zi dhe perëndimin e jugperëndimin e Serbisë, madje duke krijuar shtresa të mëdha bore deri në 30 cm edhe në zonat e ulëta e në viset malore deri në gjysëm metre, në territoret tona priten vetëm reshje shiu. Reshje bore te ne priten në viset malore, ndërsa gjatë javës bora do të paraqitet nganjëherë edhe në Kosovë.
Me kalimin e ditëve të javës temperaturat e ulëta do të arrijnë gradualisht të depërtojnë edhe në viset tona ku vende-vende do të ketë gjasa për reshje shqote e bore