Cikloni i fuqishëm i cili u formua diku në Italinë jugore solli reshje të fuqishme dhe vërshime masive në këtë pjesë të Italisë dhe vranësira të dendura Gadishullit Ballkanik. Fatmirësisht reshjet te ne nuk ishin të rrëmbyeshme sikur në Itali, por jugu i Shqipërisë u godit nga rrebeshe intensive.
Cikloni është në largim i sipër, ndërkohë mbi rajonin tonë do të fillojë rritja e presionit atmosferik, gjegjësisht ardhja e masave ajrore anticiklonike të cilat pritet të largojnë vranësirat dhe reshjet, duke kushtëzuar mot më stabil dhe rritje të temperaturave.
Moti do të fillojë të kthjellohet që nga nesër (e shtunë) kur priten edhe rreze të ngrohta diellore, por mëngjesi i hershëm mund të sjellë mjegull dhe vranësira të ulëta.
Nga e diela përmirësim i mëtutjeshëm i motit dhe temperaturat maksimale do të arrijnë dhe vende-vende edhe të tejkalojnë shifrën 20, megjithatë netët dhe mëngjeset do të jenë të ftohta, tipike vjeshtore e vende-vende me mjegull./MeteoBallkan
