Në Detin Mesdhe kemi lagështirë të madhe si dhe kemi fushat ajrore me presion të ulët atmosferik. Qendra ciklonike e cila është krijuar në Brigjet e Spanjës do të zhvillohet dhe do të përparojë në drejtim të Detit Tiren duke dërguar lagështin e madhe në drejtim të Gadishullit Ballkanik. Në anën tjetër në veri të Kontinentit Evropian kemi anticiklonin e fuqishëm i cili do të rrugëtojë në drejtim të lindjes me qendrën e tij. Në këtë mënyrë do të fillojë depërtimi i masës ajrore të ftohtë në drejtim të Ballkanit. Kjo masë ajrore e ftohtë në kontakt me lagështinë e Ciklonit Mesdhetar do të shkaktojë reshje jashtëzakonisht të fuqishme bore në Bosnjë dhe Hercegovinë, veri të Malit të Zi dhe Serbi ku trashësia e borës në viset malore pritet të arrijë deri në 70 apo 80 cm.
Cikloni Mesdhetar fillimisht në drejtim të Kosovës dhe Shqipërisë do të mundësojë depërtimin e një mase ajrore të nxehtë ku ka mundësi që ditën e nesërme dhe të Shtunën në disa rajone të ketë edhe reshje shiu të akullt. Me lëvizjen e ciklonit nga Italia në drejtim të Greqisë do ti hapet rruga ajrit të ftohtë të depërtojë edhe në Kosovë mbrëmjen e së shtunës kur pritet to fillojnë reshje të dendura bore. Reshjet e borës do të vazhdojnë natën mes së shtunës dhe të dielës ku priten edhe shtresa bore. Këto reshje pritet të ndërpritën ditën e diel kah pasditja.
Në Shqipëri do të ketë reshje të herëpashershme të dendura shiu si dhe rrebeshe lokale me vetëtima dhe bubullimë. Sipas ecurive aktuale të Dielën reshje të dendura bore priten edhe në verilindje, lindje dhe juglindje të Shqipërisë si dhe në Maqedoni./Meteoballkan.
