Pas kalimit të frontit mjaft të fuqishëm të ditës së mërkurë, të enjten do të kemi përmirësim të motit, megjithatë afrimi i ciklonit më të ri të premten do të shkaktojë reshje të reja shiu. Ky ciklon që vjen nga Evropa veriperëndimore, përshkon Evropen qendrore dhe Ballkanin duke u “përplasur” në Turqi.
Me kalimin e qendres ciklonike nga rajoni ynë tutje në juglindje drejtë Greqisë dhe Turqisë në territoret tona do të vendosen rrymime të fuqishme ajrore nga veriu. Kjo pritet të ndodhë mbrëmjes e së premtes dhe të shtunën. Cikloni do të tërheqë një masë mjaft të ftohtë ajrore me origjinë arktike dhe për këtë arsye do të kemi reshje shiu të cilat shumë shpejt do të shndërrohen në reshje bore në viset malore. Me uljen e mëtutjeshme të temperaturave bora zbret edhe në kodra, ndërsa më vonë reshje bore mund të kemi edhe në disa zona të ulëta në Republiken e Kosovës. Po ashtu do fryjnë erëra shumë të ftohta dhe nganjëherë të fuqishme nga veriu sidomos në Rrafshin e Kosovën e më pak në Rrafshin e Dukagjinit. Për këtë arsye rajonet kodrinore-malore pritet të kenë atmosferë të vërtetë dimërore të premten vonë dhe të shtunën. Fillimisht do të ketë reshje dhe rrebeshe të dendura shiu e pastaj edhe shqote e bore në zonat malore e kodrinore-malore. Nuk përjashtohet mundësia për reshje ose fjolla bore në viset e ulëta të Rrafshit të Kosovës.
Reshje bore priten edhe në disa zona malore të Shqipërisë dhe normalisht në viset kodrinore-malore të Maqedonisë së Veriut.
Cikloni i së premtes dhe shtunës do të jetë i fuqishëm, por me ikjen e tij në juglindje do të pasojë stabilizimi dhe përmirësimi gradual i motit dhe kjo pritet të ndodh të dielen edhe pse mund të mbetet mjaft ftohtë edhe dita e diell për shkak të mbetjeve të ajrit të ftohtë Arktik. Përndyshe, do të pasojë shpejt rritja e temperaturave dhe largimi i ajrit të ftohtë.
Do të jetë ky cikloni i parë që do të tërheqë një sasi të madhe të ajrit të ftohtë dhe do të na përkujtojë se stina e dimrit po afrohet shumë shpejt. Sipas ecurive aktuale sinoptike reshje të reja bore mund të kemi afër fundit të këtij muaji, por kjo mbetet të shihet./MeteoBallkan
