Çmimi mesatar i naftës pas rritjes së mesditës arriti në rreth 2 euro e 56 centë për litër. Në një pikë karburanti në Berlin, çmimi u rrit brenda pak çastesh nga 2 euro e 34.9 centë në 2 euro e 53.9 centë për litër, ndërsa në pikën më të shtrenjtë të karburantit në kryeqytet, një litër kushtonte madje 2 euro e 78.9 centë.
Ndryshe nga zakonisht, kur çmimet pas rritjes së mesditës fillojnë të bien relativisht shpejt, këtë herë ato mbetën të larta edhe pas orës 13:00.
“Bild” e lidh rritjen e menjëhershme të çmimeve me pasigurinë e re rreth ngushticës Bab al-Mandab, një nga rrugët detare më të rëndësishme që lidh Evropën me Azinë.
Huthët jemenas kanë kërcënuar me bllokim të përhershëm të kësaj rruge, pasi kanë forcuar pozicionet e tyre pranë ngushticës. Nëse anijet do të detyroheshin ta shmangnin këtë rrugë, ato do të duhej të lundronin në një itinerar shumë më të gjatë, rreth Kepit të Shpresës së Mirë dhe përgjatë gjithë Afrikës. Kjo do të rriste ndjeshëm kostot e transportit.
Sipas “Bild”, kompanitë gjermane tashmë kanë filluar të përfshijnë në çmime rrezikun e problemeve të mundshme me furnizimin, edhe pse gjatë së shtunës nuk pati tregtim të naftës së papërpunuar Brent.
Sistemi i ri në Gjermani ka përforcuar rritjet e çmimeve në mesditë
Ndryshimi i menjëhershëm i çmimeve lidhet edhe me rregullat që janë në fuqi në Gjermani që nga 1 prilli. Pikat e karburantit lejohen t’i rrisin çmimet vetëm një herë në ditë – në orën 12:00 – ndërsa mund t’i ulin ato në çdo moment.
Një analizë e klubit gjerman të automobilistëve ADAC ka treguar se pikërisht për këtë arsye diferenca mes pjesës më të lirë dhe më të shtrenjtë të ditës është bërë më e madhe. Çmimi i naftës në mesditë rritet mesatarisht me rreth 18.4 centë, ndërsa benzina E10 me 14.6 centë për litër. Koha më e favorshme për të mbushur rezervuarin tani është pak para mesditës.
Vetëm disa ditë më herët, ADAC kishte llogaritur se çmimi mesatar i naftës në Gjermani ishte 2 euro e 32.1 centë për litër, pothuajse nëntë centë më shumë se një javë më parë. Benzina E10 kushtonte 2 euro e 25.9 centë për litër.
Përmendet edhe mundësia e tre eurove për litër
Nafta kishte arritur të premten mesataren më të lartë ditore në muajin e fundit, duke kaluar 2 euro e 38 centë për litër.
“Bild” përmend edhe vlerësime sipas të cilave problemet e mëtejshme në rrugët detare, së bashku me rritjen e kërkesës për karburante alternative, në një skenar të pafavorshëm mund ta çojnë çmimin e naftës drejt 3 eurove për litër.
Për momentin, megjithatë, bëhet fjalë vetëm për një parashikim, i cili varet nga zhvillimet e mëtejshme të situatës në Lindjen e Mesme.
