Rrezet diellore që po i shohim sot nuk do të zgjasin shumë, ngase nga mbrëmja vranësirat do të vijnë duke u shtuar duke kushtëzuar edhe reshje lokale. Fillimisht priten reshje kryesisht të dobëta dhe të izoluara. Mund të ketë edhe ndonjë rrebesh shiu ose bore në disa rajone, ndërsa nga nesër vranësirat do të përfshijnë gati tërë rajonin, por ende nuk priten reshje të mëdha. Reshjet e borës do të fillojnë të zgjerohen dhe intensifikohen nesër pasdite dhe në mbrëmje. Reshje bore priten në shumë vise kodrinore-malore në lindje, juglindje dhe verilindje të Shqipërisë, veri të Malit të Zi, perëndim të Maqedonisë së Veriut dhe normalisht në shumë vise të Republikës së Kosovës ku mund të ketë edhe shtresa simbolike nëpër ultësira dhe shtresa më solide në viset pak më të larta mbidetare.
Temperaturat gjatë ditëve të ardhshme do të pësojnë ulje në tërë rajonin dhe do të na kthejnë në “gjendje dimërore”, megjithatë nuk pritet ndonjë i ftohtë ekstrem.
Dimër i vërtetë me borë pritet sidomos në viset kodrinore-malore të gati krejt rajonit tonë.
Ekspansioni anticiklonik që nga veriperëndimi i Evropës, pastaj në Skandinavi dhe Rusi si dhe ciklonet në brigjet e Afrikes Veriore, Mesdhe (Jon, Adriatik) janë kombinim përfekt për depërtimin e ajrit të ftohtë rus në rajonin tonë dhe ky kombinacion, apo kjo gjendje sinoptike do të na sjellë edhe reshje bore.
Kjo gjendje sinoptike do të vazhdojë edhe gjatë javës tjetër me reshje të herëpashershme të reja bore në viset kontinentale dhe shiu në viset mesdhetare. Edhe pse duket ftohtë këto reshje do të jenë jashtëzakonisht të mirëseardhura për shkak të thatësisë dhe po ashtu temperaturat e ulëta do të vonojnë vegjetacionin e hershëm dhe zgjimin e hershëm të natyrës dhe kjo është jashtëzakonisht e rëndësishme, ngase çdo acar i vonshëm eventual mund të dëmton kulturat e hershme pranverore. Rritje të temperaturave pritet të kemi afërsisht nga gjysma e këtij muaji, por kjo mbetet të shihet dhe përcjellet gjatë evoluimit të gjendjes sinoptike./MeteoBallkan
