Gjatë javës së re rajoni ynë do të jetë nën ndikimin e masës së fuqishme anticiklonike me qendër afër Britanisë së Madhe dhe masava ciklonike thellë në juglindje të Evropes dhe Turqi. Si pasojë e kësaj gjendje sinoptike nga periferia e anticiklonit britanik do të depërtojnë masa shumë të ftohta ajrore me origjinë polare. I ftohti pritet të jetë kryeisht i thatë, por herë pas here në disa vise kontinentale priten edhe reshje bore të cilat nuk pritet të zgjasin shumë.
I ftohti më i fuqishëm pritet të jetë gjatë dy ditëve të para të javës, pra të hënën dhe të martën. Ekstremisht i ftohtë pritet të jetë mëngjesi i së martës me temperatura të cilat pritet të ulen deri në -15 dhe – 16 gradë Celsius nëpër ultësirat e Kosovës, ndërsa në viset malore ato mund të ulen deri në -20 gradë Celsius. Në Peshter të Serbisë dhe veriun e Malit të Zi temperaturat minimale mund të ulen deri në -23 ose -24 gradë Celsius.
Lajmi i mirë është se duke filluar nga e mërkura pritet zbutje e acarit polar, edhe pse ende priten temperatura nën 0 gradë Celsius sidomos netëve dhe mëngjeseve, por intensiteti i të ftohtit do të vjen duke u dobësuar.
Nga verilindja e Kontinentit gjatë javës përsëri priten disa fronte të reja të ftohta ajrore të cilat mund të destabilizojnë motin vetëm shkurtimisht dhe vetëm pjesërisht. Këto fronte të dobëta kanë një ndikim shumë pozitiv sidomos në përmirësimin e cilësisë së ajrit./MeteoBallkan