Nesër në Kosovë do të mbajë mot kryesisht i thatë por gjatë ditës apo pasdite pritet të ketë shtim të vranësirave. Nuk përjashtohet mundësia që në mbrëmje të kemi reshje të dobëta shiu. Temperaturat do të jenë relativisht të larta për këtë periudhë kohore sepse do të kemi rrymime ajrore nga ana e jugut.
Edhe në Shqipëri nesër paradite me intervale kohore me diell kurse pasdite dhe në mbrëmje pritet shtim i vranësirave, ndërsa në disa vise bregdetare e sidomos në pjesën veriperëndimore të vendit mund të ketë edhe riga po rrebeshe lokale shiu.
Në Maqedoni mot i ngjashëm kurse pasdite apo në mbrëmje pritet të ketë shtim gradual të vranësirave me mundësi për ndonjë rigë të dobët shiu.
Cikloni Mesdhetar përmes Italisë Qendrore dhe Detit Adriatik të dielën do të “pushtojë” tërë rajonin tonë me reshje të herë pas hershme shiu. Në Shqipëri priten reshje të dendura lokale shiu kurse në veriperëndim dhe jug të vendit ka gjasa që të ketë edhe rrebeshe lokalisht të fuqishme shiu me vetëtima dhe bubullimë.
Vranësirat e shiut të dielën do të përfshijnë edhe Kosovën dhe Maqedoninë por kjo nuk do të thotë se do të ketë reshje pa ndërprerje. Pra, priten reshje të herë pas hershme shiu të intensitetit të dobët dhe mesatar. Më shumë reshje shiu priten në perëndim të Kosovës dhe Maqedonisë por edhe rajonet tjera do të përfitojnë mjaft reshje shiu ditëve të ardhshme.
Të Hënën në tërë rajonin tonë me intervale kohore me diell dhe me vranësira të cilat herë pas here do të sjellin edhe reshje shiu vende-vende.
Të Martën në mbrëmje pritet fillimi i depërtimit të ajrit të ftohtë siberik me origjinë polare kur reshjet e shiut do të shëndrrohen në reshje bore në Kosovë, Maqedoni dhe Shqipërinë verilindore.
Për të mos e zgjatur më shumë duhet të themi se hapësirë për ndryshime ka ende por ne do tju informojmë me kohë me parashikimet tona afatshkurtëra të cilat janë shumë më të besueshme dhe kredibile. Meteoballkan.
