Temperaturat e larta kanë shënuar diten e sotme në Evropë dhe njëkohësisht edhe stuhi të fuqishme shiu e breshëri kanë përfshirë shumë rajone në Gjermani, Francë, Belgjikë, Holandë etj. Kombinimi i ajrit mjaft të nxehtë afrikan me masat ciklonike nga Atlantiku kanë shkaktuar aktivizim të fuqishëm të atmosferës duke kushtëzuar rrebeshe mjaft të fuqishme shiu dhe breshëri, madje në Paderborn të Gjermanisë sot pati edhe tornado dhe dëme të mëdha materiale. Dëme materiale janë regjistruar edhe në rajone tjera për shkak të shtrëngatave të fuqishme.
Në rajonin tonë anticikloni stabil po kushtëzon mot të qetë dhe stabil dhe kështu pritet edhe ditëve të ardhshshme deri të dielën kur pritet destabilizim i pjesshëm i motit edhe te ne për shkak të ardhjes së një fronti të dobët krahasuar me frontet e fuqishme evropiane.
Nesër (e Shtunë) na pret mot stabil dhe mjaft i nxehtë, me temperatura nga 28 deri në 32 gradë Celsius.
Në anën tjetër një valë ekstreme e nxehtësisë po përgaditet të përfshijë Spanjen dhe Francën ku temperaturat pritet të arrijnë deri në 42 gradë Celsius. Ardhja e kësaj mase mjaft të nxehtë nga Afrika në Evropë do të shkakotjë stuhi të reja ditëve të ardhshme mjaft intensive dhe të fuqishme, ngase njëkohësisht do të vazhdojë depërtimi i ajrit të freskët dhe të paqëndrueshëm nga Atlantiku. Aty ku takohen këto dy masa gjigande ajrore do të ndodhin stuhitë dhe shtrëngatat më të violente.
Në rajonin tonë të dielën dhe të hënën do të kemi zhvillime të stuhive të izoluara të cilat në disa rajone mund të jenë intensive, por nuk pritet të përfshijnë pjesë të mëdha të territorin, ndërsa pas uljeve të lehta të temperaturave këto ditë, nga e marta pritet që nxehtësia nga Evropa të vjen edhe te ne, por jo në përmasa të mëdha sikur në Spanjë, Itali dhe Francë./MeteoBallkan