Aktualisht, në dy pjesë të ndryshme të botës, kemi temperatura ekstreme.
Në Çikago këtë javë priten temperatura tepër të ulëta, kërcënuese për jetën dhe ajri rekord i ftohtë.
Nga ana tjetër, Adelaide dhe pjesë të tjera të Australisë janë goditur nga një valë e nxehtë.
Deri tani, gjashtë vetë kanë humbur jetën nga i ftohti ekstrem në Shtetet e Bashkuara. Temperaturat kanë rënë sot deri në -45 gradë në Çikago, ndërsa në Dakotën e Veriut është matur – 54 gradë. Meteorologët theksojnë se më e keqja pritet të ndodhë ditëve në vijim. I ftohti polar do të jetë i pranishëm në Shtetet e Bashkuara të Amerikës të paktën të hënën, njofton MeteoBallkan.
Rekomandimi i autoriteteve shëndetësore për të mos qëndruar jashtë në këtë të ftohtë për më shumë se 10 minuta për shkak të rrezikut të ngrirjes, është respektuar në masë të madhe, kështu që sot kalimtarë të rrallë janë parë në rrugët e Çikagos.
Ministria e Transportit ka organizuar shërbime telefonike në rrugë për të ndihmuar shoferët, pasi që në ato temperatura të ulëta akumulatorët nuk punojnë dhe karburanti ngrihet.
Autoritetet në Çikago organizuan shërbime të veçanta që u kujdesën për të moshuarit në stacionet policore, kishat, bibliotekat dhe institucionet e tjera shtetërore.
U hapën strehimore të tjera për të pastrehët. Pesë autobusë të qytetit u kthyen përkohësisht në strehimore për të pastrehët.
Në anën tjetër të botës, në Australi, gjithashtu po regjistrohen ekstreme por me temperatura të larta.
Shumica e temperaturave të përditshme arrijnë pothuajse 50 gradë, dhe nxehtësia ekstreme nuk e sheh fundin.
Temperaturat po thyejnë rekordet shekullore – 5 ditë të javës së kaluar ishin në mesin e dhjetë ditëve më të nxehta në historinë e Australisë.
Temperaturat ekstreme dhe thatësirat kanë çuar në ngordhjen masive të kafshëve.
Australia nuk mban mend nxehtësi dhe thatësira të tilla, dhe dëshmia është se në ditët e fundit kjo ka çuar në ngordhjen masive të kuajve të egër. /MeteoBallkan
