Pasi që kemi eskaluar në çdo sferë jetësore e shoqërore, tani si duket edhe klima do të “eskalojë” pak këto ditë ose më mirë të themi “këto netë”. Asgjë konkrtete në aspektin e reshjeve atmosferike të jemi të qartë, por në aspektin termik ose të temperaturave do të ti kemi disa netë dhe mëngjese shumë të ftohta.
“Bisha e lindjes” ka shfaqur koken e vet në lindje, por nuk do të arrijë në viset tona sepse masat e fuqishme ajrore nga Atlantiku do të fillojnë të depërtojnë në Evropë duke rritur temperaturat, megjithatë ne do të jemi në periferi të kësaj mase të fuqishme, të ftohtë ajrore me origjinë nga veriu dhe thellë në lindje të Evropes dhe Rusisë. Kjo masë ajrore me reshje atmosferike do të shkaktojë dimër të vështirë dhe të fuqishem në shumë pjesë të Turqisë qendrore dhe sidomos veriore e lindore, me reshje të dendura bore, erëra të fuqishme veriore dhe ulje ekstreme të temperaturave.
Të kthehemi në viset tona;
Gjatë netëve të ardhshme do të kemi “eskalim” të temperaturave apo thënë ndryshe ulje të mëdha gjatë orëve të natës dhe mëngjeseve të hershme sepse do të jemi në periferi të mases ajrore polare që shkon drejt Turqisë, prandaj temperaturat do të ulen shumë në gati të gjitha viset tona.
Temperaturat në Kosovë (zonat e ulëta) do të ulen rreth -12 gradë Celsius ndonjë natë ose mëngjes, ndërsa në disa vise malore ato mund të ulen edhe më shumë. Në rajonin Ballkanik në viset më të larta malore ato mund të ulen deri në -18 gradë apo -20 gradë Celsius. Të mos keqkuptoni e kemi fjalën për temperaturat minimale në viset malore.
Sidoqoftë, e tëra kjo gjendje është plotësisht normale për këtë periudhë kohore. Gjatë ditëve temperaturat do të dalin pak në “plus”. Nga fundjava presim edhe zbutje të ndjeshme të acarit siberik.
Pra, edhe një dimër me pak borë dhe me pak shfaqje të bardhë, edhe pse në aspektin e temperaturave ky dimër në viset tona sidomos në Kosovë ka qenë dukshëm më i ftohtë se viteve të kaluara. Pak më ndryshe në Shqipëri dhe Maqedoninë Veriore.
Por, dimri ende nuk ka përfunduar dhe kemi fundin e Shkurtit dhe Marsin që mund të na befasojnë me ndonjë borë të njëmendt dhe të shpresojmë të ndodhë sa më herët para zgjimit të vegjetacionit./MeteoBallkan
