Kryetari i Komunës së Skenderajt, Fadil Nura, ka folur në lidhje me vërshimet e 19 janarit që prekën disa rajone të Kosovës, duke përfshirë këtu edhe Skenderajn. Nura në emisionin “Kallxo Përnime” ka treguar se qyteti i Skenderajt u vërshua brenda rreth 20 minutave, si pasojë e daljes nga shtrati të lumit Klina.
“Niveli i vërshimeve dhe shpejtësia ka qenë e jashtëzakonshme, për 15 deri në 20 minuta është marrë qyteti, ka dalë direkt uji prej shtratit të lumit Klina dhe sasia e ujit ka qenë jashtëzakonisht e madhe dhe fuqia e lëvizjes ka qenë gjithashtu e madhe. Pastaj brenda gjysmë ore ka shku duke u rritë niveli deri sa ka arritë në një përmbytje që besoj po e shihni edhe në storie”- shpjegon Nura.
Ai thotë se reshjet e shiut në komunën që ai drejton janë dukur si të zakonshme dhe sipas tij, epiqendra e këtyre reshjeve ka qenë në bjeshkët në kufi mes Zubin Potokut, Skenderajt dhe Mitrovicës.“Ne e kemi sektorin e emergjencave por asnjë komunë nuk ka kapacitet me bo vlerësime adekuate sepse reshjet e shiut për Skenderaj janë dukur si të zakonshme. Sipas Departamentit të emergjencave në kuadër të Ministrisë që kam pasë takim, epiqendra e reshjeve të shiut ka qenë në bjeshkët në kufi mes Zubin Potokut, Skenderajt dhe Mitrovicës gjë që ekziston një pjerrtësi që vjen në drejtim të Skenderajt”- tha Nura.I pari i Skenderajt u shpreh se vitin e kaluar nuk ka pasur ndonjë testim të veçantë të sistemit të emergjencave, por ka theksuar se ka arritur të evakuojë familjet e rrezikuara.
“Vitin e kaluar nuk kemi pasur një testim të veçantë të sistemit të emergjencave që kemi, sepse duhen njësitë e zjarrfikësve, të shërbimeve shëndetësore, në kuadër të DSHP-së që janë sektor i veçantë, por kapacitetet sigurisht mungojnë çdoherë në komunë, nuk kanë kapacitete të mjaftueshme që një asi fuqie madhore të mund të rezistojnë”- theksoi ai.“Jemi përpjekur të bëjmë një organizim aq sa kemi mundur dhe ajo çka ishte e rëndësishme është se kemi arritur t’i evakuojmë familjet të mos ketë viktima”- shton Nura.Më 19 janar 2023, Skenderaj ka qenë në mesin e komunave që është prekur rëndë nga reshjet e shiut që shkaktuan vërshime dhe përmbysje në disa pjesë.Si shkak, Komuna e Skenderaj shpalli gjendje të jashtëzakonshme.
Një ditë më pas, pamjet nga Skenderaj shfaqnin vetura të përmbytura, asfalt të çarë, lokale të demoluara dhe oborre të mbushura me ujë.Komuna ka krijuar 11 komisione komunale me nga 5 anëtarë të cilët do të dalin në terren menjëherë për të bërë vlerësimin e dëmeve të shkaktuara nga vërshimet.Ndërkohë, Instituti Hidrometeorologjik i Kosovës ka deklaruar se reshjet e shiut me intensitet të ndryshuar pritet të vazhdojnë edhe gjatë ditëve në vazhdim, deri më 25 janar 2023.
