Edhe pse sot jemi nën ndikimin e masave ekstremisht të nxehta ajrore me origjinë nga Afrika veriore, kushtet e motit do të fillojnë të ndryshojnë shumë shpejtë, fillimisht në Shqipëri, pastaj edhe në Kosovë dhe Maqedoninë Veriore.
Shkaktar i ndryshimit të motit do të jetë Cikloni i fuqishëm Gjenovian i cili është forcuar dukshëm në Gjirin e Gjenovës në Italinë veriore. Ky ciklon do të sjellë stuhi të fuqishme në shumë vise të rajonin dhe po ashtu edhe në disa vise në territoret tona.
Temperaturat do të fillojnë të bien rreth vlerave normale nga nesër (e martë).
Pra, tranzicioni nga ajri shumë i nxehtë në ajrin më të freskët do të fillojë gjatë natës me rrebeshe shiu në bregdetin shqiptar. Gjatë ditës së martë rrebeshet lokale të shiut përhapen edhe në pjesët tjera të Shqipërisë, në shumë vise të Kosovës dhe Maqedonisë së Veriut.
Fillimisht stuhi shumë të fuqishme priten në Mal të Zi dhe bregdetin verior shqiptar.
Nga e mërkura deri të dielën na pret mot më i freskët, por nuk do të mungojnë intervalet kohore me diell dhe vranësirat të cilat nganjëherë do të kushtëzojnë reshje lokale shiu dhe rrebeshe lokale me vetëtima dhe bubullimë.
Nga e enjta reshjet do të jenë më të rralla dhe më të pakta, ndërsa vazhdojnë intervalet e gjata kohore me diell. Temperaturat do të jenë të këndshme pas vapës së madhe verore. Ato maksimale afër fundjavës përsëri mund të arrijnë deri në 30 gradë Celsius pas uljes së tyre në mesjavë.
Pra, pas një periudhe mjaft të gjatë me vapë verore vinë disa ditë më të freskëta dhe me reshje lokale të herëpashershme. Temperaturat fillojnë të rriten përsëri afër fundjavës, por nuk pritet më vapë ekstreme./METEOBALLKAN
