Këtë fundjavë presim destabilizim të atmosferës si pasojë e depërtimit të një cikloni nga veriu i Italisë. Përpos viseve kontinentale parashihen krijimi i disa stuhive edhe në viset bregdetare të Shqipërisë dhe Malit të Zi.
Pushuesit nuk duhet të brengosen shumë, edhe pse kujdesi gjithmonë duhet të jetë në nivel, por energjia kryesore e stuhive pritet të ndodhë natën mes së shtunës dhe së dieles në viset bregdetare. Një masë mjaft jo-stabile ajrore pritet të depërtojë deri në jug të Detit Adriatik duke shkaktuar destabilizim të motit. Temperaturat do të jenë të larta edhe ditën e shtunë edhe ditën e diel kur pritet përmirësim gradual i motit.
E shtuna sjellë intervale të gjata kohore me diell, ndërsa në orët e pasdites në veriperëndim priten rrebeshe lokale. Ky sistem pritet të fuqizohet në orët e mbrëmjes dhe gjatë natës duke rrugëtuar drejt pjesë qendrore të Shqipërisë duke përfshirë edhe bregdetin shqiptar. Rrebeshet lokale herë pas here pritet të zgjasin deri në mëngjesin e së dieles. E diela sjellë intervale me diell dhe vranësira lokale, por atmosfera do të vjen duke u stabilizuar dhe priten intervale të gjata kohore me diell (e kemi fjalën gjithnjë për bregdet).
Pra, gjatë natës mes së shtunes dhe së dieles në shumë zona bregdetare të Shqipërisë priten rrebeshe lokale shiu me vetëtima dhe bubullimë ku nuk do të mungojnë shfaqjet spektakolare të vetëtimave në qiell. Ka shanse për ndonjë shtrëngatë të fuqishme kalimtare.
Edhe në viset kontinentale të rajonit tonë të shtunën dhe të dielën pritet të mbajë mot i ndryshueshëm, me intervale kohore me diell dhe zhvillime të rrebesheve lokale të shiut me vetëtima, bubullimë dhe gjasa për breshër. Të hënën përmirësim i motit./METEOBALLKAN
