Ajri mjaft i nxehtë afrikan ka depërtuar në rajon duke rritur temperaturat në mënyrë rapide. Bashkë me ajrin afrikan kanë depërtuar edhe elemente të pluhurit Saharian nga Afrika Veriore. Megjithatë përkundër ajrit shumë të nxehtë në atmosferë ende po qarkullojnë disa masa ajrore jo-stabile të cilat pasdite vonë edhe sot mund të prodhojnë disa stuhi të izoluara kryesisht në veriperëndim, veri dhe verilindje të Kosovës dhe në Luginën e Preshevës.
Pra, përkundër stabilizimit të atmosferës dhe rritjes së temperaturave sot pasdite vonë në disa rajone mund të ketë zhvillime të izoluara. Në veriperëndim, veri dhe verilindje/lindje të Kosovës ka më shumë gjasa për stuhi të izoluara, ndërsa në rajonet tjera ka më pak gjasa, por duke mos përjashtuar mundësinë për ndonjë befasi edhe në rajone tjera ku mund të ketë ndonjë rrebesh ose stuhi të izoluar shiu me vetëtima, bubullimë dhe breshër kryesisht në viset kodrinore-malore.
Rrebeshe të izoluara priten sot përsëri në Maqedoni, por shumica e territorit mbetet me vapë afrikane. Shqipëria po ashtu mbetet gjatë tërë ditës me diell, vranësira kalimtare dhe vapë afrikane.
Nesër (e mërkurë) na pret mot kryesisht me diell dhe me vapë të madhe, ndërsa vapa vazhdon edhe ditëve të ardhshme me mundësi për stuhi të izoluara me vetëtima, bubullimë dhe breshër pasditeve. Stuhitë nuk do të jenë gjithëpërfshirëse dhe nuk do të zgjasin shumë./Meteoballkan