Nën ndikimin e masave të fuqishme ajrore ciklonike që vijnë nga turbulencat e Atlantikut sot kemi mot të vranësirat dhe në disa rajone ka reshje shiu. Në Shqipëri reshjet janë më intensive por jo në gjithë territorin.
Reshjet më intensive sot janë në Mal të Zi dhe jug të Hercegovinës ku kemi reshje të vazhdueshme të natyrës orografike.
Në Kosovë do të kemi pak reshje, por ende jo në sasi të kënaqshme.
Turbulencat nga Atlantiku kanë destabilizuar motin në shumë vende të Evropës perëndimore, jugperëndimore e qendrore. Në anën tjetër në Mesdhe kemi depërtimin e këtyre masave ajrore ciklonike deri në Afrikën Veriore që kushtëzojnë vendosjen e rrymimeve shumë të fuqishme ajrore nga jugu në drejtim të territoreve tona.
Kjo nënkupton ardhjen e masave ajrore direkt nga Afrika Veriore në Ballkan ku shiu që do të bije mund të jetë i përzier me pluhurin nga Shkretëtirat e Afrikës veriore.
Kjo gjendje sinoptike është përfundimisht zhgënjyese për entuziastët e dimrit dhe reshjeve të borës, ngase nuk ka ndonjë shanse që masa të ftohta ajrore të kombinohen me lagështirën e masave ciklonike që do të kushtëzonin reshje bore. Kjo gjendje sinoptike do të vazhdojë edhe në fillim të Marsit, ndërsa ky dimër po llogaritet si një ndër dimrat më të varfër kur kemi të bëjmë me reshjet e borës në Ballkan, por duhet pranuar se vendet e larta malore të Republikës së Kosovës kanë pasur shtresa solide bore e në theks të veçantë Brezovica dhe disa vise në Rugovë.
Sidoqoftë, reshje bore ende ka gjasa të ketë sidomos gjatë muajit Mars dhe mund të ndodhë edhe në fillim të muajit Prill, por kjo mbetet të shihet./MeteoBallkan