Mbrëmë rreth orëve të vona të pasdites disa stuhi përfshinë veriperëndimin dhe veriun e Kosoves ku pati freski dhe rrebeshe shiu, vende-vende intensive, por të cilat nuk zgjatën shumë, ndërsa sot në mëngjes po ashtu në ato zona pati sisteme të fuqishme të izoluara të cilat prodhuan rrebeshe shumë intensive sidomos në zonat malore dhe këto sisteme u forcuan edhe më shumë në Serbi.
Në këto çaste kemi disa sisteme që nga qendra e Shqipërisë deri në Serbi, përmes Malit të Zi ku kemi një linjë të stuhive me vetëtima. Po ashtu në këto çaste kemi destabilizim të atmosferës në Dukagjin ku ka rrebeshe lokale shiu me vetëtima dhe bubullimë, mes Pejës e Gjakoves, por edhe jo shumë larg Prizrenit.
Në vazhdim të dites pritet destabilizim i fuqishëm i motit me rrebeshe të përhapura dhe intensive shiu me vetëtima dhe bubullimë, me gjasa që të formohet një sistem frontal që mund të përfshijë shumë pjesë të territorit.
Mot mjaft i paqëndrueshëm pritet edhe ditëve të ardhshme, me intervale kohore me diell dhe rrebeshe të shpeshta shiu me vetëtima dhe bubullimë
Nuk ka asnjë arsye për ndonjë panik, sepse këto ngjarje janë tërësisht normale për klimën tonë kur kemi kontaktin e temperaturave shumë të larta me ajrin e ftohtë dhe jo-stabil dhe kanë ndodhur gjithmonë, por gjithsesi në kohën e stuhive duket pasur shumë kujdes deri të kalon shtrëngata eventuale.
Kujdes i shtuar duhet gjithsesi në komunikacion dhe nëse ka vetëtima e bubullima masive të kërkohet vendstrehim, ngase të gjitha janë kalimtare./MeteoBallkan