Nën ndikimin e vazhdueshëm të masave ajrore ciklonike me origjinë nga Oqeani Atlantik, Evropa po përjeton momente shumë të vështira për shkak të reshjeve masive të shiut. Normalisht fjala është për një pjesë të Kontinentit, në veçanti Gjermania jugore dhe disa nga vendet përreth ku mund të ketë përkeqësim të situatës.
Jugu u Gjermanisë po përballet me përmbytje masive, përderisa reshjet do të pushojnë tri ose katër ditët e ardhshme. Pushimi nga reshjet mund të jetë një lehtësim i madh, megjithatë reshjet dhe rrebeshet intensive mund të rikthehen pas tri ose katër ditëve.
Stuhi të fuqishme dhe rrebeshe intensive me shi dhe breshër, lokalisht pati edhe në Ballkan si në Slloveni, Kroaci, Bosnjë dhe Hercegovinë dhe Serbi. Për dallim në viset tona reshje ishin më të rralla dhe më të izoluara. Disa rajone patën reshje më problematike, kurse shumica e territoreve tona nuk pati fare reshje këto ditë, ndërsa nga stuhitë potencialisht të rrezikshme shpëtuam lehtë sepse ato u zhvilluan në shtetet fqinje veriore, veriperëndimore dhe disa edhe në ato lindore.
Në viset tona moti po përmirësohet dhe temperaturat po rriten. Dy tri ditët e kaluara ishin me zagushi shumë të fortë për shkak të lagështisë së ajrit dhe reshjeve në vendet ballkanike.
Edhe ditëve të ardhshme në viset tona edhe më nxehtë, por disa zona presim rrebeshe kalimtare, sidomos veriu dhe veriperëndimi i Kosovës, lokalisht edhe disa vise tjera kryesisht kodrinore-malore. Rritja e temperaturave do të jetë progresive, kurse nga e Premtja kemi fillimin e valës tropikale me temperatura maksimale deri në 30 dhe mbi 30 gradë Celsius. Rrebeshet e izoluara/afatshkurtra nuk do të mungojnë.
Vala e fortë e nxehtësisë nuk pritet të zgjasë shumë. Sipas shumicës së modeleve për parashikim të motit vala e fortë e nxehtësisë do të ndërpritet në fillim të javës së re. Ka disa modele që përkrahin vazhdimin dhe fuqizimin e nxehtësisë gjatë javës së re, por shumica nuk e përkrahin një opsion të tillë. Sidoqoftë, mbetet të shihet gjatë dy ditëve të ardhshme deri sa modelet të sqarojnë plotësisht situatën./MeteoBallkan
