Sot kemi hyrë zyrtarisht në vjeshtë! Ekuinoksi i vjeshtës, kur dita dhe nata barazohen, është një fenomen i njohur nga të gjithë, por çdo vit përjetohet me ndjesi të ndryshme.
Ditënata e 22 dhe 23 shtatorit është dita e parë astronomike e vjeshtës. Nis kështu stina e njohur për ngjyrat e saj, për të vjelat, frutat, shkollën, por është gjithashtu edhe një mbyllje. Nata dhe dita barazohen për të vazhduar me net të tjera që do të marrin minuta nga dita dhe kështu do të vazhdojë deri në solisiticin e dimrit.
Për këtë arsye, veç emocionit të një fillimi, kjo ditë mund të jetë edhe pak depresuese.
Në ditën e parë të vjeshtës sot në Kosovë pritet të mbajë mot shumë i nxehtë, me erëra të nxehta nga jugu dhe priten edhe vranësira të herëpashershme kalimtare. Rrallë në disa vise mund të ketë edhe rrebeshe kalimtare shiu me ndonjë vetëtimë dhe bubullimë. Temperatura maksimale parashihet të arrijë deri në 33 gradë Celsius.
Të dielën destabilizim i fortë i motit. Parashihen intervale kohore me diell dhe rrebeshe lokale shiu me vetëtima dhe bubullimë. Pasdite në Kosovë priten zhvillime të fuqishme të shtrëngatave lokale me bubullimë dhe me breshër dhe rrebeshe mjaft intensive lokale. Temperaturat do të shënojnë ulje.
Të hënën na pret mot më i freskët, ndërsa zhvillimet e fuqishme zhvendosen në Maqedoninë Veriore, jug të Kosovës dhe lindje e juglindje të Shqipërisë, lokalisht edhe në disa vise tjera./METEOBALLKAN
