Një i nxehtë ekstrem, me temperatura të cilat do të arrijnë deri në 40 gradë Celsius, ka pushtuar tashmë Shqipërinë në gjysmë të korrikut dhe nga institucionet po bëhet thirrje për marrjen e masave, mbi të gjitha sa i takon grupeve të moshës së tretë dhe fëmijëve, për të shmangur përkeqësimet shëndetësore.
Agjencia Kombëtare e Mbrojtjes Civile ka dalë me disa këshilla për këto dy grupe, ku kryesori është ai i qëndrimit të hidratuar dhe në vende në hije, për sa të jetë e mundur.
Në raste të kundërta, këshillohet të mbahen mjete mbuluese për kokën si kapelat apo çadrat dhe këshillohet që të vishen rroba të lehta.
Sa i takon shtëpisë, këshilla kryesore është ajo e ajrosjes sa më të shpejtë të ambienteve aty ku mundet.
Oraret me diellin më të dëmshëm janë prej orës 11:00 deri në 16:00 dhe këshillohet që në këtë interval të shmanget dalja nga ambientet e freskëta.
Teksa, për çdo situatë të krijuar për shkak të temperaturave të nxehta, bëhet thirrje që të njoftohen autoritetet mjekësore dhe të urgjencës menjëherë, për dhënien e ndihmës së parë.
