Mijëra njerëz janë evakuuar nga shtëpitë dhe hotelet në Ishullin Rodos të Greqisë, pasi ishulli është kapluar nga zjarret.
Anijet private dhe ato të marinës greke i janë bashkuar rojeve bregdetare greke për të ndihmuar në marrjen e njerëzve nga plazhet e ishullit.
Pesë helikopterë dhe 173 zjarrfikës po operojnë në zonë, ndërsa tre hotele në zonën e Kiotarit raportohet se janë dëmtuar nga zjarri.
Një pushuese britanike tha se ishte evakuuar nga hoteli ku po qëndronte me motrën dhe vajzën e saj, por tani ishte ngecur në një plazh me qindra të tjerë në vapën e madhe.
“Këtu ka vetëm një kasolle të vogël dhe ka shumë njerëz. Ka fëmijë, është mesi i ditës, ne kemi ngecur këtu pa asnjë ndihmë, është e neveritshme”, tha Becky Mulligan, shkruan BBC, transmeton Klankosova.tv.
Ndërsa, Greqisë po i dalin në ndihmë edhe zjarrfikësit nga Sllovakia, të cilët kanë mbërritur në Rodos, për t’i ndihmuar ekipet lokale.
“Situata në Rodos është serioze dhe jashtëzakonisht e vështirë. Për shkak të erës së fortë dhe ndryshimit të shpejtë të drejtimit të zjarrit, zjarrfikësit u detyruan të tërhiqeshin dhe të lëviznin”, thuhet në njoftimin e Shërbimit Sllovak të Zjarrfikësve.
Greqia po përballet me nxehtësi të mëtejshme intensive këtë fundjavë, me meteorologët që paralajmërojnë se temperaturat mund të rriten deri në 45 gradë Celsius.
https://twitter.com/CglenEnglish/status/1682775634613870593?ref_src=twsrc%5Etfw%7Ctwcamp%5Etweetembed%7Ctwterm%5E1682775634613870593%7Ctwgr%5E39f85bf8483c4b2067808f7f9d33ddd44744f234%7Ctwcon%5Es1_&ref_url=https%3A%2F%2Fpublish.twitter.com%2F%3Fquery%3Dhttps3A2F2Ftwitter.com2FCglenEnglish2Fstatus2F1682775634613870593widget%3DTweet
