Masa ajrore me origjinë nga Afrika Veriore do të zhvendosen përsëri në drejtim të rajonit tonë duke kushtëzuar rritje të ndjeshme të temperaturave edhe ashtu të larta. Nxehtësia e këtyre ditëve është e rëndë për shkak të nivelit të lartë të lagësishtisë relative të ajrit apo zagushisë, e jo shumë për shkak të temperaturave të larta, por temperaturat pritet të shënojnë rritje të konsiderueshme gjatë kësaj jave duke bërë që të përjetojmë edhe një valë mjaft të fuqishme nxehtësie afrikane.
Nga nesër (e martë) në tërë rajonin tonë na pret mot kryesisht me diell dhe mjaft i nxehtë. Do të jemi nën ndikimin direkt të masave ajrore të nxehta me origjinë nga Afrika Veriore si dhe nën ndikimin e masave të thata ajrore anticiklonike. Në disa vise kryesisht kodrinore-malore nuk përjashtohet mundësia për ndonjë rrebesh të pasditeve dhe mbrëmjeve. Temperaturat shënojnë rritje çdo ditë për të kulmuar të mërkurën dhe të enjtën ku në Kosovë ajo maksimalja pritet të luhatet nga 35 deri në 38 gradë Celsius. Në Shqipëri, Maqedoni dhe Mal të Zi përsëri priten 40 gradë Celsius.
Lajmi i mirë është se edhe kjo valë nxehtësie nuk pritet të zgjasë shumë. Një ciklon nga Atlantiku pritet të depërtojë në Francë, Zvicër dhe Italinë Veriore, pastaj në Evropen qendrore suke sjellë reshje dhe freski atje. Gjatë fundit të javës ky ciklon nga Evropa qendrore pritet të zhvendoset në Gadishullin Ballkanik duke ulur temperaturat dhe duke sjellur reshje shiu dhe shtrëngata lokale.
Pra, para nesh edhe një javë jashtëzakonisht e nxehtë, ndërsa freskia së bashku me reshjet e shiut sipas të gjitha gjasave pritet të na përfshijë gjatë fundjavës./Meteoballkan