Me reshjet e borës që kanë filluar tashmë e disa ditë në vendin tonë, është bërë qarkullimi edhe më i vështirë.
Por, shumë vështirësi po kanë edhe qytetarët e rrugës B në kryeqytet, shkruan gazetametro.net.
Gjendja në këtë rrugë është e tmerrshme, madje përveç aksidenteve të makinave, qytetarët edhe po rrëzohen derisa kalojnë aty.
Ata janë shprehur se kjo rrugë do t’ua shkaktojë vdekjen, derisa kanë thënë se e njëjta duhet të kishte qenë prioritet i Komunës.
‘Kjo rrugë do të bjerë vdekje’, ka thënë njëri prej këmbësorëve.
Ndërsa një tjetër, ka shtuar se rruga e cila duhej të ishte prioritet i Komunës, duhet të pastrohet para se të bllokohen të gjithë.
Ndonëse kompania e pastrimit nuk mori as një hap, qytetarët kishin dalë për të kryer punën e tyre, duke hedhur rërë mbi akull.
Derisa nga nervozimi, ata kanë filluar edhe të ironizojnë me kryetarin e Prishtinës.
‘Ka mbetë veq me ardhë kryetari i Prishtinës me skija, dhe po e bëjmë me skijat’, ka thënë një qytetar.
Ndryshe, pas reshjeve në vendin tonë Ministria e Infrastrukturës kishte lajmëruar se të gjitha rrugët janë pastruar nga bora dhe janë të kalueshme.
