Bazuar në ecuritë aktuale sinoptike në Kosovë bora e parë parashihet të bie diku afër datës 27 Nëntor ditën e diel dhe kjo do të kushtëzohet nga një ciklon tjetër mesdhetar i cili në kontakt me ajrin e ftohtë nga veriu do të kushtëzojë reshjet e para të borës në shumë vise të Kosovës.
Gjithnjë duke u bazuar në ecuritë aktuale sinoptike bora do të bie në shumicën e territorit të Republikës së Kosovës, por nuk do të jetë aq e qëndrueshme dhe nuk do të bie në ultësirat e Dukagjinit. Kjo do të varët tërësisht nga sasia e ajrit të ftohtë që cikloni do të tërhjek nga veriu apo verilindja dhe kjo mbetet ende “objekt studimesh dhe analizash” nga modelet globale kompjuterike për parashikim të motit.
Normalisht reshje më të dendira bore priten në viset kodrinore-malore, por për të qenë më të sigurtë dhe për të ditur detaje rreth sasisë së reshjeve duhet pritur edhe ndonjë ditë për të marrë analizat më të sakta nga modelet numerike të motit.
Ndryshime në parashikim gjithsesi mund të ketë, por duke u bazuar në ecuritë aktuale sinoptike të dielën do të kemi reshjet e para të borës në shumë pjesë të Republikës së Kosovës.
Të gjitha detajet e reja do ti postojmë sapo ti kemi në dispozicion./MeteoBallkan
