Sot pasdite modelet globale numerike për parashikim të motit në Kosovë japin mundësinë e zhvillimet të disa stuhive të izoluara të shiut me vetëtima, bubullimë dhe mundësi për breshër afatshkurtër. Edhe pse jemi nën ndikimin e masës së nxehtë afrikane dhe masës së thatë anticiklonike, depërtimi i një sasie fare të vogël të ajrit jo-stabil mund të sjellë rrebeshe të izoluara shiu sot. Rrebeshet nuk pritet të zgjasin shumë dhe nuk pritet të përfshijnë pjesë të mëdha të territorit. Rrebeshet e izoluara do të jenë të shpërndara, prandaj nuk mund të themi me saktësi optimale se cilat janë rajone që mund të preken, por përparësi kanë viset kodrinore-malore.
Shumica e territorit do të mbetet pa reshje, por mund të llogarisim një freskim sadopak afatshkurtër nga shiu ose nga vranësirat në ato rajone që mund të gjenerohen. Rrebeshe të izoluara mund të ketë edhe viset kodrinore-malore në lindje të Shqipërisë dhe perëndim të Maqedonisë së Veriut si dhe në disa vise të Kosovës lindore.
Përndryshe, vapa afrikane do të vazhdojë me tendenca të fuqizimit të mëtutjeshëm. Temperaturat mund të prekin shifrën 40 edhe në Kosovë pas disa ditëve./Meteoballkan
