Erërat e fuqishme që po fryjnë sonte në Kosovë janë si pasojë e afrimit të një fronti në kuadër të ciklonit të fuqishëm me qendër në Evropën veriperëndimore. Në viset malore në veriperëndim dhe veri të Kosovës erërat mund të arrijnë shpejtësinë deri në 90km/h. Erëra të fuqishme do të ketë edhe në malet në jug të Kosovës.
Erëra mjaft të fuqishme ka edhe në Shqipëri, sidomos në viset malore dhe bregdet. Në veri të Shqipërisë erërat pritet të arrijnë shpejtësi mbi 100km/h.
Nesër në Kosovë do të mbajë mot kryesisht i vranët dhe me reshje shiu. Mund të ketë edhe rrebeshe lokale shiu me vetëtima dhe bubullimë. Po ashtu do të ketë ende erëra, por erërat më të fuqishme pritet të jenë sonte gjatë natës. Temperaturat do të vazhdojnë të jenë të larta për shkak të rrymimeve të fuqishme ajrore nga jugu. Reshje më intensive priten në veriperëndim, perëndim dhe veri të vendit.
Në Shqipëri nesër pritet mot i vranët, me erëra dhe reshje shiu. Vende-vende me rrebeshe shiu me vetëtima dhe bubullimë. Ngjashëm do të jetë edhe në Mal të Zi, ndërsa në Maqedoninë veriore kryesisht pa reshje, por me erëra të forta jugore. Reshje shiu mund të ketë në perëndim dhe veriperëndim të Maqedonisë së Veriut.
Edhe ditëve të ardhshme pritet mot i ngjashëm, me erëra jugore, riga të herëpashershme shiu dhe nganjëherë me intervale kohore me diell. Qetësim i motit sipas të gjitha gjasave pritet natën e fundit të këtij viti dhe ditën e parë të vitit 2021 kur pritet që temperaturat të shënojnë ulje, por nuk pritet i ftohtë i madh./Meteoballkan
