Sot në Kosovë do të mbajë mot i ndryshueshëm, me intervale kohore me diell dhe vranësira të herë pas hershme. Vende vende ka gjasa për ndonjë rigë të dobët shiu ose bore. Temperaturat do të vijnë duke u ulur gradualisht dhe do të fryjë erë e dobët deri mesatare nga veriu dhe veriperëndimi.
Në Shqipëri dhe Maqedoni r mot me intervale kohore me diell dhe vranësira kalimtare. Gradualisht do të ketë edhe ulje të temperaturave.
Të shtunën fillimisht në jug të Shqipërisë do të kemi vranësim të fuqishëm të motit me reshje të fuqishme shiu dhe bore varësisht nga lartësia mbidetare. Në juglindje kryesisht reshje bore.
Pastaj reshjet do të vijnë duke u zgjeruar në drejtim të tërë territorit të Shqipërisë ku në lindje, verilindje dhe viset kodrinore malore priten reshje të dendura bore. Në viset tjera priten reshje shiu me përjashtim të jugperëndimit të skajshëm ku ka mundësi që të jetë thatë. Reshjet gjatë natës së të shtunës dhe të dieles do të përfshijnë edhe Maqedoninë perëndimore ku priten kryesisht të jenë të dendura dhe në formë të dëborës.
Në mëngjesin e së dieles reshjet e borës do të përfshijnë edhe territorin e Republikës së Kosovës. Reshjet e borës pritet që herë pas here të jenë të dendura.
Sipas ecurive aktuale reshjet pritet të ndërpriten natën mes të dieles dhe të hënës. Situata pas ditës së hënë është shumë e paqartë për shkak të kontradiktave mes modeleve GFS dhe ECMWF./Meteoballkan.
