Kjo javë ka filluar mjaft e ftohtë, madje edhe me reshje bore në viset kodrinore-malore, ndërsa fjolla kalimtare bore pati edhe në disa vende më të ulëta.
Tani radhën e ka përmirësimi substancial i motit dhe rritja e temperaturave, por para se të arrijmë atje të përmendim mundësinë dhe potencialin e madh për acar që ka mëngjesi i së martës, për shkak të kthjellimit të plotë të motit dhe pushimit të erërave. Temperaturat gjatë mëngjesit së nesërm mund të ulen deri në -3 gradë Celsus në nivel vendi, pra bryma është pothuajse e paevitueshme gjatë mëngjesit të nesërm, prandaj apelohet për kujdes brenda mundësive për parandalimin e dëmtimit të pemëve dhe kulturave tjera bujqësore këtë pranverë të hershme. Gjatë ditës së nesërme priten stabilizim i plotë i motit dhe rritje e temperaturave. Edhe mëngjesi i së mërkurës nuk është krejtësisht imun nga bryma, ngase temperatura në disa rajone pritet të ulet deri në 0 gradë Celsius.
Nga e mërkura do të jemi nën ndikimin e masave ajrore stabile anticiklonike të cilat na sigurojnë mot kryesisht stabil, me erëra kryesisht të lehta deri mesatare drejtimesh të ndryshme dhe rreze të shumta diellore. Të entjën na pret mot kryesisht me diell dhe i ngrohtë, me temperatura mbi 20 gradë Celsius, ndërsa të premtën na presin temperatura deri në 24 gradë Celsius në Kosovë.
Për fundjavë pritet të kemi destabilizim gradual të motit dhe ulje graduale të temperaturave. Në fund të shpresojmë që kjo valë e të ftohtit të jetë e fundit, ngase gjatë kësaj jave priten rritje të ndjeshme të temperaturave çfarë do të shkakton “boom” në ringjalljen e natyres dhe çdo goditje më e vonshme dimërore do të mund të ishte shumë më e dëmshme se kjo tani. Sipas ecurive aktuale sinoptike edhe një goditje pritet krejt në fund të kësaj jave dhe fillim të javës së re, por sinqerisht të shpresojmë që parashikimet të zbuten i ftohti të mos jetë me “minuse”./MeteoBallkan