Dy ditët e para të javës do të jenë mjaft të ftohta dhe me acar të fortë gjatë natës dhe mëngjesit. Reshje atmosferike nuk priten për shkak se tani jemi nën ndikimin e fushave ajrore të thata anticiklonike që vijnë nga Afrika Veriore, ndërsa gjatë mesit të javës pritet edhe trysnia e Atlantikut me fusha ajrore ciklonike. Ky kombinim do të kushtëzojë ngritje të shpejtë të temperaturave gjatë mesit dhe fundit të javës.
Reshje atmosferike nuk do të ketë deri të mërkurën në Shqipëri ku priten riga të dobëta lokale shiu ose fjolla dëbore vende-vende për shkak se masat e lagështa nga Mesdheu mund të ndeshen me mbetjet e masave të ftohta siberike dhe të kushtëzojnë ndonjë fjollë dëbore e cila pastaj do të shndërrohet në reshje shiu.
Në Kosovë pa reshje deri afër ditës së enjte kur në disa pjesë të Dukagjinit mund të ketë fjolla bore ose riga shiu.
Reshjet e shiut do të fillojnë të shpeshtohen nga e premta sidomos në Shqipëri dhe disa vise të Dukagjinit, ndërsa për fundjavë reshje të herëpashershme shiu priten në tërë rajonin, për arsye se ciklonet nga Atlantiku dhe Mesdheu do të depërtojnë më thellë në drejtim të juglindjes respektivisht rajonit tonë.
Temperaturat pra, në këtë fillim javë do të jenë nën vlera mesatare, pastaj nga mesi i javës do të baras peshohen me vlerat mesatare, ndërsa shumë shpejt do të ngriten mbi vlera mesatare dhe ato maksimalet fare lehtë mund të prekin shifrën 10 gradë Celsius. Po ashtu pritet edhe aktivizimi i erërave jugore dhe jugperëndimore nga mesi i javës.
Vazhdon mot mjaft dinamik këtë Janar të vitit 2021 me ngritje/ulje të shpeshta të temperaturave. Pauza e reshjeve të shiut është jashtëzakonisht e mirëseardhur për shkak të vërshimeve dhe të shpresojmë që reshjet që parashihen afër fundjavës dhe javës tjetër të mos jenë të intensitetit të lartë, sidoqoftë parashikimet janë se reshjet do të jenë mjaft aktive dhe ne do të jemi duke e përcjellur evoluimin e gjendjes sinoptike dhe do ju njoftojmë në postimet tona të përditshme./Meteoballkan