Në përgjithësi nuk priten ndryshime të mëdha të kushteve sinoptike gjatë kësaj jave edhe pse nuk pritet po ashtu që të kemi mot plotësisht stabil.
Rajoni ynë gjatë fillimit të kësaj jave pritet të jetë nën ndikimin e masave ajrore jo-stabile ciklonike që vijnë nga Oqeani Atlantik, por këto masa ajrore nuk janë shumë të pasura me lagështi. Temperaturat pritet të jenë gati gjatë tërë javës mbi masatare për këtë periudhë kohore për shkak të ndikimit të këtyre masave të ngrohta nga Atlantiku përmes Mesdheut dhe Afrikes Veriore. Edhe pse në Evropen veriore dhe lindore kemi temperatura ekstremisht të ulëta, kombinimi dhe qarkullimi i masave ajrore nuk do të favorizojë depërtimin e ndonjë mase shumë të ftohtë ajrore në drejtim të rajonit tonë. Nganjëherë priten depërtime të disa fronteve të ftohta kryesisht të dobëta nga veriperëndimi me reshje kalimtare shiu e bore në viset malore, por pa ndonjë skenar të mundshëm dimëror.
Nga fundi i javës pritet të kemi fuqizimin e një anticikloni në judperëndim të Evropes dhe Mesdheun perëndimore dhe njëkohësisht një ciklon në Skandinavi dhe ky kombinim rrit temperaturat edhe më shumë në rajonin tonë duke riaktivizuar rrymimet ajrore nga jugu.
Pra, gjatë kësaj jave na pret mot i ndryshueshëm, me alternime të shpeshta të vranësirave, intervaleve kohore me diell dhe rigave lokale të shiut. Në fund të javë rritje e temperaturave të cilat ato maksimale në Kosovë mund të arrijnë deri në 14 ose 15 gradë Celsius, ndërsa në Shqipëri deri në 18-19 gradë Celsius.
Edhe pse nuk kemi borë për shkak të gjendjes së pafavorshme sinoptike për reshje bore nuk do të duhej të ankoheshim shumë, ngase kjo gjendje sinoptike po na mundëson mot pak më të ngrohtë në këtë kohë krize dhe njëkohësisht edhe ajrin e kemi kualitativ pikërisht për shkak të kësaj gjendjeje sinoptike. Në këto periudha gjatë viteve të kaluara kemi pasur mjegullnaja të mëdha dhe ndotje të mëdha të ajrit të cilat e bënin jetën të padurueshme sidomos në qytetet dhe qytezat e indrustrializuara dhe kjo të shikohet me një pozitivitet./MeteoBallkan
