Mot me më shumë diell dhe me më shumë atmosferë stabile na pret gjatë kësaj jave, por megjithatë duhet pranuar se nuk pritet stabilizim i plotë i motit dhe se stabilizimi i motit nuk do të zgjasë shumë.
Është shumë e rëndësishme se do të kemi rritje të ndjeshme të temperaturave në mënyrë që të shijojmë momente verore.
Nga sot e deri të shtunën do të kemi mot kryesisht stabil, të nxehtë dhe me diell. Po ashtu priten rritje të përditshme të temperaturave, megjithatë shanse për rrebeshe të izoluara paraqiten të martën pasdite vonë, të mërkurën dhe të premten. Këto rrebeshe do të jenë vetëm në disa vise malore, por të mërkurën dhe të premten mund të paraqiten kudo në viset kontinentale të Kosovës. Këto rrebeshe me bubullima do të jetë të karakterit krejtësisht lokal dhe të koncentruara më së shumti përgjatë disa viseve kodrinore-malore.
Në aspektin termik temperaturat shënojnë rritje të ndjeshme progresive duke arritur kulminacionin të premten edhe në Kosovë ku priten vlera mbi 30 gradë Celsius, ndërsa në Shqipëri pak mbi 35 gradë Celsius.
Të shtunën stuhi dhe shtrëngata të fuqishme parashihen sipas ecurive aktuale sinoptike. Një front i ftohtë ajror nga veriperëndimi do të depërtojë në atmosferën e ngrohur nga temperaturat e larta duke shkaktuar destabilizim të bujshëm të atmosferës me zhvillime shumë të fuqishme konvektive që do të kushtëzojnë rrebeshe intensive shiu me vetëtima dhe bubullimë dhe shtrëngata të fuqishme me breshër e vetëtima e bubullima të zhurmshme.
Ky front përpos destabilizimit të atmosferës do të shkaktojë ulje të temperaturave por jo aq të theksuara./Meteoballkan
