Edhe gjatë kësaj jave do të kemi një valë reshjesh atmosferike të cilat në disa rajone mund të sjellin probleme afatshkurtra për shkak të lagështisë së madhe dhe reshjeve të shumta gjatë tërë verës, megjithatë nga dita e mërkurë mbi rajonin tonë do të depërtojnë masa kryesisht stabile dhe të thata anticiklonike të cilat do të jenë të mirëseardhura.
Pra dita e hënë dhe veçanërisht e marta do të karakterizohen me mot mjaft të paqëndrueshëm me rrebeshe lokale shiu me vetëtima dhe bubullimë të cilat do të shpeshtohen gjatë së martës dhe pritet të ndërpriten në tërësi nga e mërkura. Në aspektin termik nesër do të jetë mjaft nxehtë dhe ma zagushi, kurse pasnesër do të kemi ulje të temperaturave dhe freskim të motit. Edhe dita e mërkurë do të jetë e freskët por pa reshje atmosferike, ndërsa nga e enjta në tërë rajonin tonë na pret mot kryesisht me diell dhe me ngritje progresive të temperaturave. Temperaturat maksimale përsëri pritet të kapin dhe tejkalojnë shifrën 30.
Në bregdet reshje ose stuhi afatshkurtra mund të ketë gjatë ditës së martë, ndërsa ditët tjera pritet të jenë kryesisht stabile, me diell dhe të nxehta.
Ishte ky parashikimi javor me fjalë të pakta dhe nëse eventualisht do të ketë ndonjë ndryshim do tu njoftojmë ne postimet tona të përditshme./Meteoballkan
Image by: Meteociel