Edhe gjatë kësaj jave do të kemi mot të ndryshueshëm ku do të kemi “nga pak nga të gjitha stinës”.
E marta dhe mërkura do të karakterizohen me mot mjaft të ngrohtë për këtë periudhë kohore si pasojë e depërtimit të masave të nxehta ajrore nga Mesdheu dhe Evropa perëndimore në drejtim të rajonit tonë.
Në mesjavë pritet të kemi një masë të ftohtë ajrore me origjinë polare e cila do të shkaktojë destabilizim të motit dhe ulje të temperaturave. Nga nata e së mërkurës në të enjten do të kemi edhe reshje atmosferike (shiu dhe bore), varësisht nga pozita gjeografike dhe lartësia mbidetare reshjet do të jenë në formë shiu ose dëbore. Reshje dekorative bore do të ketë edhe nëpër disa qytete apo qyteza të Republikës së Kosovës, por përgjithësisht reshjet nuk pritet të jenë të bollshme. Po ashtu priten edhe ulje të temperaturave të cilat do të jenë në suaza të normales për këtë periudhë kohore.
Të premtën pritet stabilizim afatshkurtër i motit, kurse të shtunën pritet të kemi mot kryesisht jo stabil dhe me reshje sporadike shiu dhe dëbore më të koncentruara në viset kodrinore-malore, kurse të dielën pritet të kemi stabilizim të motit dhe ngritje të temperaturave./Meteoballkan
Image by: Meteociel