Dy ditët e fundit të Prillit po i përcjellim me mot stabil për shkak të ndikimit të fortë të anticiklonit stabil. Edhe dita e parë e Majit do të jetë kryesisht stabile, megjithatë do të fillojë ndikimi i masave ajrore ciklonike nga Italia.
Si pasojë me 1 Maj do të ketë shtim të vranësirave dhe aty-këtu ndonjë rigë ose rrebesh shiu, prandaj (nëse nuk ndodhë ndonjë ndryshim i papritur) mund të kalohen momente të mira në natyrë me mot kryesisht stabil, por me shtim lokal të vranësirave dhe aty-këtu ndonjë rigë ose rrebesh shiu kryesisht orëve të vonshme të pasdites ose mbrëmjes.
Dita e dytë e Majit shënon destabilizim të atmosferës. Parashihen intervale kohore me diell dhe zhvillime të rrebesheve lokale të shiut me vetëtima dhe bubullimë. Lokalisht mund të ketë ndonjë shtrëngatë fuqishme me breshër dhe rrebeshe intensive. Reshjet do të jenë tipike pranverore apo verore të karakterit lokal. Temperaturat pa ndonjë ndryshim të theksuar. Në kohën e intervaleve kohore me diell ato do të jenë relativisht të larta për të pësuar ulje në kohën e rrebeshe dhe vranësirave. Do të ketë ulje-rritje të shpeshta të temperaturave për shkak të ndryshimeve të motit gjatë intervalit kohor ditor.
Për fundjavë sipas të gjitha gjasave do të kemi kalimin e masave edhe më të fuqishme ciklonike që vijnë nga Atlantiku përmes Evropes, Ballkanit dhe territoreve tona në drejtim të Bullgarisë dhe Turqisë, prandaj parashihen vranësira edhe më të shpeshta dhe reshje shiu si dhe ulje e temperaturave.
Pra, para nesh një javë me mot mjaft të ndryshueshëm. Tri ditët e para të javës me më shumë diell dhe me atmosferë të qëndrueshme. Dita e Mërkurë mund të shënojë fillimin e ndryshimit gradual të motit, me shtim lokal të vranësirave dhe aty-këtu ndonjë reshje kryesisht të pakta. Nga e Enjtja destabilizim gjithnjë e më i fuqishëm i kushteve atmosferike. Përpos intervaleve kohore me diell parashihen vranësira dhe zhvillime të herëpashershme konvektive, me rrebeshe lokale shiu me vetëtima dhe bubullimë. Këto do të jenë rrebeshet e para sezonale.
Për fundjavë edhe më shumë reshje shiu dhe ulje e përkohshme e temperaturave. Përmirësim afatshkurtër të motit sipas ecurive aktuale të sinoptikës mund të presim të dielën, por kjo mund të ndryshojë. Temperaturat nga 5 minimalja deri në 26 gradë Celsius maksimalja, gjatë javës dhe në fundjavë në rënie por jo aq të theksuar. Në Shqipërinë mesdhetare dhe Maqedoninë Veriore më nxehtë.
Ishte ky me pak fjalë parashikimi javor i motit që mund të pësojë disa ndryshime gjatë javës. Për çdo ndryshim eventual do të njoftoheni me kohë./MeteoBallkan
