Kjo javë do të karakterizohet me mot kryesisht stabil gjatë ditëve të punës, ndërsa ndryshim i motit pritet gjatë fundjavës për shkak të zhvendosjes së një mase të fuqishme ajrore jo-stabile nga veriu i Adriatikut në drejtim të territoreve tona dhe Evropës lindore.
Fronti i ftohtë i cili mbërriti mbrëmë uli temperaturat dhe lokalisht solli edhe rrebeshe shiu. Gjatë ditës së sotme pason stabilizimi i atmosferës dhe rritja graduale e temperaturave.
Mot kryesisht stabil dhe me diell e vranësira lokale e kalimtare do të mbajë nga e marta deri të premten. Vranësirat do të jenë të pranishme nganjëherë sidomos ditën e mërkurë ku lokalisht do të ketë edhe ndonjë rigë afatshkurtër shiu. Afër fundjavës do të kemi rritje të ndjeshme të temperaturave për shkak të një kreshte termike nga jugperëndimi që fuqizohet përpara frontit të ftohtë të fundjavës. Temperaturat të premten mund të arrijnë deri në 37 gradë Celsius në Kosovë, ndërsa në Shqipëri dhe Maqedoninë Veriore deri afër 40 gradë Celsius, por kjo nuk do të zgjasë, ngase për fundjavë na pret destabilizim i motit që nga bregdeti e deri në viset kontinentale do të ketë po ashtu edhe ulje të temperaturave. Po ashtu priten edhe rrebeshe shiu duke përfshirë edhe viset bregdetare ku rrebeshet do të jenë kalimtare.
Pra, gjatë kësaj jave na pret mot kryesisht stabil dhe me diell. Të mërkurën vranësira dhe ndonjë rigë shiu, por pa ulje të temperaturave. Të entjen dhe të premten mjaft nxehtë dhe kryesisht me diell. Në fundjavë destabilizim i motit. Sa i përket fundjavës mund të ndodhin ende ndryshime në parashikim dhe për çdo ndryshim eventual do tju njoftojmë në postimet tona të përditshme./METEOBALLKAN
