Kjo javë parashihet të karakterizohet me mot mjaft të ndryshueshëm. Nuk do të mungojnë ditët e mira dhe stabile, por jo tërësisht dhe gjithashtu nuk do të mungojnë ditët e ftohta dhe me shi e madje edhe mundësi për borë në viset më të larta malore.
Java ka filluar me vranësira e intervale kohore me diell. Fillimi i javës do të jetë i freskët, por në mesdite i ngrohtë. Pasditeve do të ketë zhvillime të rrebesheve të izoluara kryesisht në disa pjesë të Dukagjinit, Shqipërisë dhe Maqedonisë së Veriut ku priten rrebeshe të izoluara shiu me vetëtima dhe bubullimë. Temperaturat rreth apo pak nën vlerat mesatare për këtë periudhë kohore.
Përmirësim të shkurtër të motit do të kemi të Mërkurën dhe të Enjten me më shumë orë me diell dhe më pak vranësira si dhe me rritje të temperaturave.
Të Enjten vonë një masë e ftohtë ajrore nga veriu do të depërtojë duke rritur shansin për zhvillimin e një cikloni të fuqishëm që vjen nga Afrika veriore në drejtim të Ballkanit. Ajri jo-stabil nga veriu dhe lagështia nga Mesdheu mund të kushtëzojnë fuqizimin e ciklonit i cili do të sjellë rrebeshe shiu, reshje shiu e pastaj pritet të kemi një ulje të madhe të temperaturave dhe në viset më të larta malore mund të kemi reshje bore edhe pse jemi në mes të muajit Maj. Jo shumë e pazakontë për viset më të larta malore, por megjithatë kemi të bëjmë me një ekstrem sepse temperaturat do të jenë ekstremisht nën vlerat mesatare për këtë periudhë kohore
Cikloni i së Premtes do të sjellë vranësira të dendura dhe reshje të shpeshta shiu në të gjitha viset tona duke përfshirë Shqipërinë, Kosovën, Maqedoninë Veriore, Luginën e Preshevës dhe Malin e Zi. Vende-vende mund të ketë reshje më intensive, por rënia e temperaturave do të jetë mjaft e fuqishme sidomos të Premten eventualisht të shtunën. Sipas ecurive aktuale sinoptike të Shtunën pritet përmirësim gradual i motit dhe të dielën rritje e temperaturave, megjithatë mbetet gjasa për reshje të izoluara edhe pas kalimit të ciklonit.
Pra, një javë me mot të ndryshueshëm. Mesi i javës më i nxehtë dhe më stabil. Të Premten mjaft ftohtë me reshje shiu e bore në viset më të larta malore. Fundjava pak më nxehtë, me intervale kohore me diell dhe mundësi për reshje të izoluara.
Ishte ky parashikimi i motit për këtë javës. Për shkak të dinamikes atmosferike ndryshime pritet të ketë sidomos rreth ciklonit të ditës së Premte dhe çdo lëvizje e tij nga trajektorja e tanishme mund të ndryshojë sidomos sasinë e reshjeve atmosferike. Për çdo ndryshim eventual do të njoftoheni në postimet tona të përditshme./MeteoBallkan
