Edhe kjo javë në Kosovë, Shqipëri dhe rajon po karakterizohet nga temperaturat mjaft të larta verore. Vranësirat në disa rajone po marrin karakter zhvillimi në pjesën e dytë të ditës dhe rrallë në disa vise po ka ndonjë rrebesh lokal shiu me vetëtima dhe bubullimë.
Mot i ngjashëm na pret deri në fund të javës me rritje të mëtutjeshme të temperaturave, megjithatë nuk do të mungojnë zhvillimet e rrebesheve lokale të shiut me vetëtima dhe bubullimë.
Rrebeshet e shiut do të jenë më të theksuara ditën e enjte ku lokalisht priten rrebeshe intensive me shkarkesa atmosferike, por megjithatë reshjet mbesin të izoluara dhe lokalizuara.
Nga e premta dhe për fundjavë rrebeshet e pasdites mbesin më të theksuara në disa zona kontinentale të Shqipërisë dhe Maqedonisë së Veriut, por temperaturat mbesin të larta në tërë rajonin. Temperaturat shënojnë ulje të përkohshme vetëm në zonat me vranësira dhe rrebeshe shiu.
Në përgjithësi edhe një javë e nxehtë verore, me temperatura mjaft të larta të cilat në Kosovë do të arrijnë deri në 35 gradë Celsius, ndërsa në Shqipëri dhe Maqedoninë Veriore edhe më nxehtë. Këtë nxehtësi e ndërprejnë rrebeshet e shiut vetëm në zona të caktuara orëve të pasdites.
Me ardhjen e fundit të Gushtit dhe fillimit të Shtatorit përfundon vera meteorologjike dhe fillon vjeshta meteorologjike. Vjeshta kalendarike vjen me 21 Shtator. Edhe fillimi i Shtatorit mund të na sjellë ditë të mira verore, por kjo mbetet të shihet/METEOBALLKAN
