Masa gjigande anticiklonike janë krijuar në Mesdheun perëndimorm Evropen perëndimore-qendrore dhe Gadishullin Iberik, gjithnjë me tendencë të shtrirjes në drejtim të Gadishullit Ballkanik. Ky bllok i fuqishëm anticiklonik është “përgjegjësi” kryesor për mungesën totale të reshjeve të dëborës këto ditë dhe ditët që do të vijnë.
Në aspektin termik sivjet e kemi dukshëm më ftohtë se dimrin e kaluar, prandaj temperaturat janë rreth vlerave mesatare për këtë periudhë kohore, megjithatë mungesa e borës po vazhdon edhe këtë dimër ashtu sikurse shumë dimra të kaluar.
Anticikloni shumë i fuqishëm dhe stabil do të mbizotërojë edhe këtë javë në territoret tona duke na siguruar mot kryesisht stabil dhe pa reshje atmosferike. Të enjten dhe të premten presim një dobësim të këtij anticikloni në viset tona dhe mund të kemi një depërtim të një fronti të dobët të ftohtë ajror që mund të sjellë ndonjë reshje kryesisht të dobët lokale.
Përkundër kësaj anticikloni në Mesdhe do të rifuqizohet menjëherë pas kalimit të frontit të dobët duke na siguruar mot kryesisht stabil dhe pa reshje atmosferike edhe në fundjavë.
Temperaturat ditore do të fillojnë të rriten që nga nesër (e Martë), por mëngjeset dhe netët mbesin të ftohta dhe me acar.
Një ulje të sërishme, të përkohshme të temperaturave ditore presim të premten së bashku me frontin e dobët, të ftohtë ajror, por në fundjavë temperaturat rriten përsëri në mënyrë rapide.
Pra, edhe një javë me mot të thatë dhe me acar në orët e hershme të mëngjesit. Për shkak të masave stabile ajrore mund të kemi inversionin e temperaturave dhe krijimin e mjegullnajave në disa ultësira të lugina të territoreve tona. Reshje të pakta atmosferike presim vetëm të Premten.
Ishte ky parashikimi i motit për këtë javë, gjegjësisht për ditët e fundit të Janarit 2024 dhe ditët e fillimit të Shkurtit 2024. Ndryshime të vogla gjithsesi mund të ndodhin. Për çdo ndryshim eventual do të njoftoheni në postimet tona të përditshme./MeteoBallkan
