Edhe kjo javë po karakterizohet me mot të mdryshueshëm dhe të paqëndrueshëm, por pa reshje domethënëse atmosferike.
Fushat ajrore me presion të ulët atmosferik nga Evropa veriperëndimore po vazhdojnë të ndikojnë në rajonin tonë, por reshjet kryesore mbesin në Ballkanin veriperëndimor dhe disa pjesë të Ballkanit përëndimor ku pati edhe stuhi të fuqishme shiu me vetëtima, bubullimë dhe breshër sidomos në Slloveni, Kroaci, Bosnjë dhe Hercegovinë dhe Serbi. Frontet me reshje kur po arrijnë në territoret tona po dobësohen, megjithatë gjatë dy -tri ditëve të ardshme priten reshje lokale veçanërisht të enjtën kur reshjet mund të jenë më të zgjeruara sidomos në Kosovë dhe veri të Shqipërisë.
Moti mbetet i paqëndrueshëm sidomos ditën e enjte dhe të premte kur priten edhe ulje të temperaturave. Herë pas here priten edhe reshje shiu dhe rrebeshe lokale shiu me vetëtima dhe bubullimë me ulje të temperaturave.
Nga e shtuna pritet stabilizim i motit dhe ngritje e temperaturave, ndërsa e diela pritet të shënojë mot me diell, stabil dhe me ngritje të ndjeshme të temperaturave. Do të jetë kjo fillimi i një vale e nxehtësie me origjinë afrikane që fillon nga e diela dhe sipas të gjitha gjasave vazhdon edhe në fillim të javës tjetër ku temperaturat pritet të shkojnë mbi 30 gradë Celsius./Meteoballkan
