Masa të fuqishme ajrore të ftohta me origjinë polare kanë përfshirë juglindjen e Evropes. Stuhi të fuqishme me bore kanë përfshirë Greqinë dhe Turqinë. Gjendja më e rënduar është në Turqi ku bora po shkakton kaos në pjesë të ndryshme të vendit.
Rajoni ynë gjendet mes këtyre masave ekstreme të ftohta nga juglindja dhe masave më të ngrohta nga perëndimi dhe veriperëndimi të cilat pritet të zbusin gradualisht acarin e fortë polar gjatë javës. Edhe sot dhe nesër do të jemi nën ndikimin e masës së fortë polare, ndërsa nga e mërkura acari i fortë polar pritet të zbutet gradualisht. Temperaturat ditore pritet të dalin në “plus”, kurse acari i natës pritet të dobësohet dhe zbutet, edhe pse ende priten “minuse” rreth -6 deri në -8 gradë Celsius. Të mërkurën mund të ketë edhe reshje afatshkurtra bore në disa vise të Republikës së Kosovës.
Reshjet atmosferike do të jenë të dobëta dhe të izoluara gjatë kësaj jave, pra nuk priten reshje të mëdha, madje në shumicën e territoreve të rajonit tonë nuk priten reshje fare. Vlenë të theksohet mundësia e reshjeve lokale gjatë fundjavës kur një front i ri nga veriu pritet të arrijë në rajonin tonë, por nuk priten reshje të mëdha. Në pjesët mesdhetare priten reshje lokale shiu, ndërsa në kontinent reshje lokale bore. Temperaturat gjatë fundjavës ulen përsëri, por nuk priten ulje ekstreme të tyre.
Pra, deri të mërkurën shumë ftohtë, nga e mërkura më “butë”. Të premtën rritje të ndjeshme të temperaturave, ndërsa të shtunën ulje e sërishme e tyre me mundësi për reshje lokale atmosferike.
Temperatura më e ulët pritet të jetë sonte ose nesër në orët e hershme të mëngjesit ku nëpër shumë pjesë të Kosovës pritet të regjistrohet -15, -16, -17 gradë Celsius, madje në viset malore mund të ulet edhe më shumë deri në -20 gradë Celsius.
Mjaft ftohtë pritet edhe nata mes së martës dhe të mërkures me temperatura minimale nga -10 deri -16 gradë Celsius në viset malore./MeteoBallkan
