Acar të fortë pritet të kemi gjatë kësaj jave sidomos në natën e ndërrimit të motmoteve për shkak të depërtimit të masave mjaft të ftohta ajrore me origjinë polare. Fronti i ftohtë do të fillojë të depërtojë të martën gjatë dites duke u intensifikuar pasdite, në mbrëmje dhe gjatë natës. Fronti do të përfshijë të gjitha viset që nga veriu i Kosovës e deri në jug të Shqipërisë.
Megjithatë, fronti dhe në përgjithësi kjo masë mjaft e ftohtë ajrore do të jetë kryesisht e thatë, pra shumë e varfër me lagështi, prandaj reshje do të jenë të pakta, lokale dhe simbolike. Reshje bore priten kryesisht në disa vise kodrinore-malore të Kosovës, pastaj në veri, lindje dhe juglindje të Shqipërisë dhe perëndim, jugperëndim dhe veriperëndim të Maqedonisë së Veriut. Edhe në këto zona reshjet do të jenë të pakta dhe të izoluara.
Kulminacioni i acarit do të jetë pikërisht në natën e 31 Dhjetorit dhe mëngjesin e hershëm të 1 Janarit.
Temperaturat në Kosovë do të ulen deri në -10 gradë Celsius, e në disa vise malore në rajon deri në -15 gradë Celsius. Në Plavë të Malit të Zi shumë afër veriut të Shqipërisë mund të ulet deri në -18 apo -20 gradë Celsius.
Edhe pse do të jemi nën ndikimin e erërave shumë të ftohta nga veriu vranësirat do të jenë të pakta dhe lokale. Në Kosovë pak më shumë vranësira, por të cilat nuk do të zgjasin. Në Shqipëri kryesisht diell.
Të Enjten, ditën e parë të Vitit të Ri 2026 i ftohti ende do të mbetet, por do të zbutet dhe do të fillojë të largohet gradualisht. Njëkohësisht do të fillojnë të fryjnë erëra nga jugu dhe jugperëndimi si pasojë e fillimit të ardhjes së masave më të ngrohta ajrore nga Mesdheu.
E Premtja:
Së bashku më këto masa ajrore vinë edhe vranësira nga Mesdheu, fillimisht në Mal të Zi, Shqipërisë dhe Dukagjin të Kosovës. Kur vranësirat ndeshen me mbetjet e ajrit polar atëherë reshjet në fillim në disa zona mund të jenë në formë bore dhe shqote, pastaj me rritjen e temperaturave ato do të shndërrohen në reshje shiu.
Sipas parashikimeve aktuale:
Fundjava vjen me vranësira, erëra jugore e jugperëndimore dhe reshje lokale shiu. Në Shqipëri reshjet mund të jenë më intensive dhe më të përhapura, por reshje të shpeshta mund të ketë edhe në Dukagjin të Republikës së Kosovës, perëndim të Maqedonisë së Veriut e sidomos në Mal të Zi ku priten reshje të dendura atmosferike.
Përse u larguan reshjet e borës që ishin në kartat meteorologjike për fillim të Janarit?
Temperaturat polare me reshje të dendura bore që ishin paraparë të vinë në viset tona do të përfshijnë pjesë të Evropës dhe mund të depërtojnë edhe në shumë pjesë të Ballkanit sidomos në Slloveni, Kroaci, Bosnjë dhe Hercegovinë dhe veri të Serbisë. “Fajtori” kryesor për këtë ndryshim është shkëputja e një cikloni nga brigjet lindore të Shteteve të Bashkuara të Amerikës në Oqeanin Atlantik në drejtim të bregdetit të Portugalisë. Ky ciklon ndryshoi rrymimet ajrore në Atlantik dhe Mesdhe dhe do të aktivizojë rrymimet perëndimore dhe erërat jugore në viset tona duke larguar ose së paku duke prolonguar reshjet e borës që ishin paraparë ditët e para të Janarit.
Ishte ky parashikim javor i motit që përfshinë ditët më të fundit të vitit 2025 dhe ditët e fillimit të vitit 2026.
Ndryshime në parashikim mund të ketë dhe për çdo ndryshim eventual do të njftoheni me kohë në postimet tona të përditshme./MeteoBallkan
