Pas një jave me dominim absolut anticiklonik dhe me kthjellime të plota e acar të fortë në mëngjes, kjo javë na premton mot më të ndryshueshëm dhe më të butë, edhe pse temperaturat maksimale mund të pësojnë ulje të lehta, minimalet do të shënojnë rritje për shkak të vranësirave më të shpeshta dhe reshjeve lokale që priten.
Duhet theksuar se në Kosovë pritet reshje të pakta. Pak më shumë reshje priten në Shqipëri. Reshjet do të jenë të herëpashershme dhe karakterit lokal ku nganjëherë priten riga shiu e fjolla bore.
Për shkak të mbetjeve të ajrit të ftohtë polar që po mbretëron këto ditë, kur të vijnë vranësirat e reshjeve në disa zona do të ketë fjolla bore sidomos në viset kodrinore-malore, por vranësirat së bashku kanë në shoqërinë e tyre edhe ajrin më të ngrohtë nga Mesdheu, prandaj temperaturat do të zbuten sidomos ato minimale dhe acari do të zbutet plotësisht e bora do të bëhet shi në ato rajone ku bjen por vetëm përkohësisht.
Reshje lokale shiu e fjolla bore priten të Mërkurën dhe të Enjten dhe për shkak të rrymimeve ajrore të forta nga jugu temperaturat do të rriten. Acari i fortë i mëngjesit do të jetë prezent vetëm edhe sonte (mëngjesit e së Martës), pastaj do të zbutet.
Nga e marta vranësira më të shumta vijnë me reshje kryesisht të dobëta atmosferike, por edhe pse do të kemi rritje të temperaturave mos mendoni se dimri ka dhënë fjalën përfundimtare.
Për fundjavë mund të kemi rikthimin e dimrit, madje mund të ndodhë në ndonjë formë spektakolare, por gjithsesi duhet pasur kujdes në parashikim sepse modelet vazhdojnë të jenë jashtëzakonisht jo-stabile dhe të paqëndrueshme sidomos në parashikimet afatgjata, prandaj një parashikim afatgjatë sidomos nga modeli Evropian po bëhet gjithnjë e më “nonsens”. Të shprerojmë që modeli evropian këto anomali ti rregullojë dhe të kthehet në “normalitet” si modeli më i besueshëm global për parashikim të motit.
Sidoqoftë, të themi edhe një herë për këtë javë disa fjalë: zbutje e acarit, më shumë vranësira, reshje lokale atmosferike; më shumë në Shqipëri dhe Mal të Zi e më pak në Kosovë, erëra kryesisht nga jugu, jugperëndimi dhe juglindja. Fundjava sjellë ndryshim dhe rikthim potencial të dimrit, madje me mundësi edhe për reshje bore.
Pasiqë pritet që gjysma e dytë e Shkurtit të jetë dukshëm më dinamike do të mundohemi të jemi sa më aktiv dhe gjithashtu nuk përjashtohet mundësia për ndonjë goditje të fuqishme dimërore sepse gjendja sinoptike mund të favorizojë një gjë të tillë, por kjo mbetet vetëm si sinjal i fortë dhe ende nuk mund të kemi parashikim preciz./MeteoBallkan
