Java e dytë e Dhjetorit pritet të karakterizohet me mot mjaft të ndryshueshëm në rajonin tonë dhe priten reshje të reja atmosferike. Fusha të fuqishme ajrore ciklonike nga Atlantiku dhe Mesdheu pritet të dominojnë plotësisht gjatë kësaj jave duke kushtëzuar reshje të reja shiu e bore.
Sot me uljen e temperaturave pritet të fillojnë reshjet e borës në shumë pjesë të Republikës së Kosovës dhe Malit të Zi, disa pjesë të Shqipërisë dhe Maqedonisë së Veriut si dhe në Luginë të Preshevës. Pas ardhjes së një cikloni të fuqishëm me qendrë në Detin Jon, Greqi dhe Turqi do të vendosen rrymime të ftohta ajrore nga veriu dhe për këtë arsye priten reshje bore, normalisht në viset mesdhetare të Shqipërisë priten reshje të dendura shiu.
Me kalimin e këtij cikloni të mërkurën pritet stabilizim i plotë i motit, por do të jetë mjaft ftohtë. Ndërkohë nga Britania e Madhe në drejtim të Adriatikut, Mesdheut dhe rajonit tonë “zbret” një tjetër ciklon mjaft i fuqishëm.
Me ardhjen e ciklonit të ri erërat do të ndryshojnë menjëherë drejtim dhe do të fillojnë të fryjnë nga jugu. Për këtë arsye bora që pritet sonte dhe nesër nuk do të jetë e qëndrueshme, ngase erërat jugore dhe shiu nga e enjta do të kushtëzojnë shkrirjen dhe largimin e saj sidomos nga ultësirat. Nëpër viset e larta malore bora pritet të jetë e qëndrueshme.
Pra, të mërkurën pritet të kemi pauzë nga reshjet atmosferike. Reshjet rikthehen menjëherë të enjtën kryesisht në formë të shiut. Në Shqipëri përsëri priten reshje intensive. Pas largimit të ciklonit të së enjtës gjatë ditës së premte një tjetër ciklon nga Atlantiku depërton në Mesdhe. Pas një pauze të shkurtër gjatë fundjavës pritet të kemi reshje të reja atmosferike dhe varësisht nga temperaturat dhe pozicionimi i saktë i ciklonit reshjet pritet të jenë në formë dëbore ose shiu.
Në aspektin termik, temperaturat shënojnë ulje të ndjeshme sot nesër dhe pasnesër. Të enjtën shënojnë rritje për shkak të erërave jugore. Gjatë fundjavës kemi të bëjmë me një “luftë” mes masave pak më të ngrohta nga Mesdheu dhe masave të ftohta nga veriu dhe për këtë duhet të presim pak për të dhënë një parashikim sa më të saktë.
Pra, para nesh një javë mjaft e pasur me reshje atmosferike. Reshjet pritet të shkaktojnë edhe probleme sidomos në Shqipëri, por duke mos përjashtuar edhe disa vise në Kosovë sidomos rajonin e Dukagjinit. Me ardhjen e reshjeve të dendura atmosferike në viset malore fare lehtë mund të shkaktohen edhe bllokada si pasojë e trashësië së madhe të borës./MeteoBallkan
